Andrey Kondrashov, një ndër njerëzit kryesor të propagandës së presidentit rus, Vladimir Putin po qëndron në Kosovë.
Kondrashov është zëvendësdrejtor i Përgjithshëm i rrjetit televiziv shtetëror rus VGTRK.
Sipas burimeve të redaksisë, nuk dihet saktë arsyeja pse ai gjendet në Kosovë, por dyshimet janë se “ai nën petkun e gazetarit ka qëllime që të mbledh informacion të ndjeshëm, i cili mund të ta dëmtojë sigurinë e Republikës së Kosovës”.
Ballkani.info ka siguruar video ekskluzive ku Kondrashov bashkë me një grup personash janë ndaluar nga Policia e Kosovës duke bërë inçizime të paautorizuara në Aeroportin e vjetër të Prishtinës, ku është e vendosur një pjesë e KFOR-it dhe njësi tjera ushtarako policore.
Burimet e Ballkani.info thonë se ata nuk kanë pasur fare akreditim për të realizuar dokumentarin e as për të marrë pamje në zona të ndjeshme, siç është kjo pjesë e Aeroportit.
Të vetmet autoritete që lëshojnë leje apo akreditim për gazetarët e huaj është Ministria e Punëve të Brendshme dhe ajo e Punëve të Jashtme.
Deri vonë Kondrashov ka udhëhequr programin Vest Nedeli (Lajmet e Javës), ndërsa në janar të vitit 2018, ai është bërë zëdhënës i selisë së fushatës elektorale të presidentit rus, Vladimir Putin.
Ai është autor i disa filmave dokumentar, përfshirë edhe filmin “Krimea, rruga për atdhe”, e cila përqendrohet në ngjarjet e vitit 2014, gjatë aneksimit të Krimesë. Ky film paraqet një intervistë të gjatë me presidentin rus, Putin.
Kondrashov ishte edhe në mesin e gazetarëve të dekoruar nga presidenti rus, Putin për mbulimin “objektiv” të ngjarjeve në Krime.Ai është gjithashtu autor i filmit dokumentar me titull “Putin”, i cili përbehet me një seri intervistash me këtë të fundit.
Ky film gjithashtu përmban intervista me kryeministrin rus, Dimitry Medvedev, sekretarin e këshillit të sigurisë Nikolai Patrushev, ish-kancelarin gjerman dhe ish-kryeministrin italian.
