OBSH paralajmëron dështimin e iniciativës së COVAX dhe për këtë fajin e kanë vendet e pasura, pasi po marrin çdo vaksinë të mundshme në dispozicion.
Por përveç vaksinave në dizpozicion, OBSH-së i mungojnë edhe paratë.
Kreu i OBSH, Tedros Adhanom Ghebreyesus tha se ka një boshllëk prej 22.9 miliardë dollarësh për të financuar plotësisht qasjen në mjetet e nevojshme për të luftuar pandeminë koronavirus. Gjithsesi, paratë nuk janë e vetmja sfidë për OBSH-në, pasi nëse nuk ka vaksina në dispozicion për të blerë, atëherë fondet janë të parëndësishme.
“Aktualisht, disa vende të pasura po bëjnë kontrata me prodhuesit e vaksinave që minojnë marrëveshjet që Covax ka arritur dhe reduktojnë numrin e dozave që ky organizëm mund të blejë. Edhe nëse ne kemi fonde, ne mund të shpërndajmë vaksina për shtetet e varfra vetëm nëse vendet e pasura bashkëpunojnë duke respektuar ujditë që Covax ka bërë. Kjo nuk është një çështje bamirësie, por epidemiologjike”, tha Ghebreyesus.
Aktualisht, më shumë vaksina po zhvillohen dhe prodhohen globalisht dhe në të ardhmen do të ketë doza mjaftueshëm për të gjithë. Por për momentin dhe përgjatë këtij viti do të jenë një burim i kufizuar, ndaj OBSH këshillon që të përdoren në mënyrë strategjike.gsh.
