PDK-ja i ka bërë thirrje Qeverisë së Kosovës që të rishqyrtojë vendimin në lidhje me gazsjellësin, një projekt i financuar nga SHBA të cilin ministrja e Ekonomisë në një konferencë për media para disa dite, njoftoi se nuk do ta vazhdojnë këtë projekt.
Shefi i Grupit Parlamentar të PDK-së, Abelard Tahiri në konferencë për media pas mbledhjes së Kryesisë së Kuvendit, tha se Kosova nuk e ka luksin që ta refuzojë këtë projekt.
“I bëjmë thirrje Qeverisë së Kosovës që ta rishqyrtojë këtë vendim sa i përket bashkëpunimit me SHBA për çështjen e gazit, mendojmë se Kosova nuk e ka lluksin që të refuzoj një projekt të till”, deklaroi Tahiri
Ndryshe, ministrja e Ekonomisë, Artane Rizvanolli, përmes një konference për media të mbajtur më 30 shtator tha se projekti, i financuar nga Korporata e Sfidave të Mijëvjeçarit nga Shtetet e Bashkuara të Amerikës, nuk do të vazhdojë pasi vendi ka nevojë për më shumë informata.
“Ne kemi nevojë për më shumë informata për të qenë të sigurt se ndërtimi i infrastrukturës së gazit është opsioni më i mirë për tranzicionin tonë energjetik, ndërsa nga ana tjetër MCC-ja ka afate strikte kohore për zhvillim dhe nënshkrim të programit të kompaktit”
“Në këtë situatë, përballë afateve kohore që ka MCC-ja, ne kemi vendosur të ecim tutje dhe të shfrytëzojmë investimin e alokuar për programin e kompaktit, për investime me risk më të ulët por që gjithashtu ndihmojnë Kosovën drejt dekarbonizimit të sektorit të energjisë dhe krijojnë kushte për zhvillim ekomomik dhe zhvillim të sektorit privat”, ka thënë Rizvanolli në këtë konferencë për media.
