Studenti i Universitetit të Prishtinës “Hasan Prishtina”, Arbër Hoti, i cili ndjek studimet e nivelit master në Fakultetin e Ndërtimtarisë ka bërë një ankesë për vlerësim të padrejtë të notimit nga ana e profesorit Naim Hasani.
Studenti Arbër Hoti ka thënë për Kosova Post se polemikat me profesorin Hasani kanë filluar qysh para 3 viteve në kohën kur ai ndiqte studimet në bachelor, kur profesor Hasani ka filluar ta ofendojë në bazë të dukjes fetare. Hoti tha se pas reagimit të tij profesori ka filluar që t’i hakmerret në notim.
“Problemet me profesorin Naim Hasani kanë filluar qysh kur unë isha në bachelor për shkak të dukjes time fetare. Ai më është drejtuar me disa fjalë ofenduese siç është po dukesh si anëtarë i Isis-it dhe si pasojë e reagimit nga ana ime ai më ka kërcënuar se nuk do të më kalojë në provimin në lëndën Hidraulika, është fjala për vitin 2017 dhe fatkeqësisht provimin e kësaj lënde nuk kam munduar asnjëherë ta kalojë deri sa kam bërë kërkesë që të vlerësohem me komision. Mos kalimi në këtë provim ka bërë që unë 1 vit më vonë të regjistrohem në master pavarësisht që notat e mija në lëndët e tjera ishin maksimale”, tha ai duke shtuar se këto mosmarrëveshje dhe padrejtësi kanë vazhduar edhe në studimet master.
“Kurse në lëndën Hidrologjia II kam bërë përgatitje maksimale dhe në të dy pjesët e provimit kam punuar shumë, këtë e them me bindje të plotë. Çuditërisht profesori më ka notuar me notën 6, unë kam qenë i bindur që kam merituar notë maksimale, në qoftëse vazhdon kjo qasje e njëjtë e profesorit mua më ulet mesatarja dhe nuk mund të aplikojë për asistent në fakultet”, shtoi Hoti.
Studenti në fjalë ka bërë kërkesë në dekanat që të rivlerësohet, mirëpo thotë se profesori nuk e ka dërguar materialin e tij punues tek komisioni për rivlerësim me arsyetimin që i ka humbur.
“Unë kam bërë kërkesë te dekani që të rivlerësohem për të gjitha provimet tek profesori Naim Hasani por profesori nuk ia ka dërguar asnjëherë materialin vlerësues komisionit për rivlerësim me arsyetimin që i ka humbur dhe për këtë komisioni për rivlerësim nuk ka mundur ta kryejë punën dhe për të njëjtën lëndë krejt në mënyrë të papranueshme profesori e ka ndërruar notën time në sems ku e ka vendosur notën 5, kjo më ka shtyrë që unë të dorëzojë ankesë edhe në dekanat edhe në Ministrinë e Arsimit ku më është dhënë premtimi që do ta shqyrtojnë ankesën time”, tha Hoti.
I pyetur nga Kosova Post se a ka dëshmi për ndërrimin e notës dhe në qoftëse ka a mund ta bëjë publike studenti Arbër Hoti është përgjigjur se ka një audio ingjizim në momentin kur i kumtohet nota dhe në çfarëdo rasti mund ta bëjë publike. Kurse ai përfundojë duke thënë se ka pritshmëri që ankesa e tij të shqyrtohet me seriozitet.
“Unë pres që këshilli i fakultetit ta trajtojë me seriozitet ankesën time që të mos ballafaqohem me probleme të ngjashme në të ardhmen. Është absurde se qysh një profesor ka kësi autoriteti që studentin ta vlerësojë me çfarë dëshiron dhe komisionit nuk ia jep materialin vlerësues”, tha Hoti për Kosova Post.
Ndërsa profesori në fjalë Naim Hasani ka thënë që asnjëherë nuk e ka ofenduar dhe nuk pa pasur ndonjë përplasje me studentin dhe sa i përket notimit thotë që studenti Arbër Hoti nuk ka merituar notë me të lartë se atë që ia ka vendosur.
“Ai ka shpifur për ofendim, unë nuk kam pasur asnjë mosmarrëveshje as në vitin 2017, bile këtë gjë e kam kuptuar vetëm kur studenti ka bërë ankesë. Unë kur e kam pyetur për pjesën e fundit me gojë ai është prezantuar se dëshiron notë të lartë dhe në momentin kur i kam shtuar pyetje ai nuk ka ditur, dhe ia kam vendosur notën 5, më ka thënë që do të kërkojë komision për rivlerësim i kam thënë në rregull”, tha ai ndërsa ka mohuar ti ketë thënë ndonjëherë studentit se dukeni si ISIS.
I pyetur se përse nuk e ka dorëzuar me kohë materialin vlerësues të studentit ai thotë se në momentin kur është dashur ta dorëzojë nuk ka mundur dhe komisioni nuk ka pritur.
“Materialin të cilin ma kanë kërkuar ku është vlerësuar gojarisht e kam dërguar menjëherë, kurse materialin e herës së dytë atë ditë nuk e kam pasur me vete i kam thënë të presin mbas dy dite e dorëzoj, mirëpo nuk kanë pritur”, theksoi Hasani duke shtuar se në qoftëse ka dëshmi le ta publikojë kur të dojë.
“Sa i përket dëshmisë le ta publikojë kur të dojë, ai më ka shkruar sms dhe më ka thënë pse mbas dy muajve nuk e kam notën në sems, mirëpo unë notat 5 nuk i vendosi por pasi që ai kërkoi unë ia vendosa. Ai ka pretenduar për notë të lartë në kohën kur unë isha ende i pavendosur a 5 apo 6 dhe kam vazhduar me pyetje, por ai nuk e i ka ditur pyetjet elementare të cilat i kam edhe me vete”, tha profesori./Kosova Post.
