Kryeministri i vendit, Albin Kurti sot në Kuvendin e Kosovës i është përgjigjur pyetjeve të deputetëve për dialogun me Serbinë dhe takimit që do të mbahet të hënën, më 27 shkurt në Bruksel.
Kurti duke folur për planin evropian për normalizimin e raporteve Kosovë-Serbi tha se plani nuk është produkt i negocimit por shumë më shumë ka të bëjë me historinë prej më shumë se një dekade të dialogut në Bruksel, raporton Telegrafi.
“Unë e kam pranuar parimin të cilën e kanë kërkuar ndërmjetësuesit evropian e ai është transparenca e procesit dhe konficidencialiteti i bisedimeve”, tha Kurti, duke iu përgjigjur pyetjeve të deputetëve për përmbajtjen e planit evropian.
Ai tha se rrjedhimisht përmbajtjen tekstuale e ka ndarë me kryetarët e partive opozitare, por jo edhe në Kuvend, ndonëse tha se beson që pas shumë muajve pothuajse asgjë nuk ka ngelur e panjohur nga ai propozim.
“Nuk është produkt i negocimit, meqenëse me 18 gusht 2022 është hapur tema e kornizës së përgjithshme të marrëveshjes pa pasur takime për atë temë sepse pala tjetër nuk ka qenë e gatshme… nuk është që ne kemi negociuar dhe është sjell propozimi… propozimi shumë më shumë ka të bëjë me historinë prej më shumë se një dekade të dialogun në Bruksel dhe nuk është që unë kam kërkuar diçka dhe është në atë propozim… ose pala tjetër”, tha Kurti.
Ai shtoi se aleatët e Kosovës e kanë dizajnuar pra si një pako që do të avancojë anëtarësimin e Kosovës në sistemin ndërkombëtar dhe i cili përmban njohjen de facto, e gjithë kjo bazuar në Kartën e Kombeve të Bashkuara për marrëdhëniet ndërmjet shteteve të pavarura.
Ai më tej ka folur edhe për përfshirjen e Kishës Ortodokse Serbe në propozimin evropian, duke thënë se propozimi përmban një pikë mbi formalizimin e statusit të Kishës Ortodokse Serbe.
“…Siç e kam thënë, propozimi për marrëveshje përmban një pikë mbi formalizimin e statusit të Kishës Ortodokse Serbe, formalizimi nuk nënkupton negocimin mbi statusin e saj, e as diskutim mbi të drejta të veçanta. Formalizim i referohet si një person juridik fetar, si bashkësi fetare në Legjislacionin e Brendshëm të Kosovës”, u shpreh Kurti.
Ai tha se garanton se asgjë të veçantë apo historikisht kontestuese që ka të bëjë me kishën ortodokse nuk do të pranojë të përfshihet.
