Sot, Sindikata e Bashkuar e Arsimit, Shkencës dhe Kulturës ka thirrur protestë, ku ka adresuar një sërë kërkesash ndaj Qeverisë së Republikës së Kosovës, përfishrë miratimin e ligjit për paga, zbatimin e Ligjit për Sigurimin Shëndetësor dhe ndryshim-plotësimi i Ligjit për Skemat Pensionale, transmeton Kosova Post.
Rrjedhimisht, për shkak të kësaj shumicën prej shkollave të Kosovës nuk është duke u mbajtur mësimi.
Së këndejmi, Këshilli i Prindërve të Kosovës ka reaguar për mos zhvillimin e mësimit sot në institucionet arsimore publike ku e vlerëson se vonesa në miratimin e Ligjit të Pagave dhe mos zhvillimi të dialogut social Qeveri-Sindikata është duke nxitur reagimi edhe tek të punësuarit në sektorin e arsimit, qoftë përmes protestave e grevave, të drejta këto që u janë garantuar me ligj. Ata shtuan se e vetmja palë e dëmtuar në këtë proces janë fëmijët dhe vetë prindërit.
“Ne si prindër, bashkë me fëmijët tanë, jemi pala e vetme e dëmtuar në këtë proces dhe pa mjete ligjore për të mbrojtur të drejtat tona kushtetuese. Ne vazhdojmë ta paguajmë faturën e mos veprimeve, nganjëherë edhe inateve, në mes të punëdhënësit, në këtë rast Qeverisë së Kosovës, dhe punëmarrësve, në këtë rast mësimdhënësve në sektorin e arsimit publik”, thuhet në reagim.
Edhe koalicioni i OJQ-ve për Mbrojtjen e Fëmijëve – KOMF i cili përfaqëson 34 organizata joqeveritare ka shprehur shqetësimin për ndërprerjen e mësimit në tërë sistemin arsimor në Kosovë.
“KOMF e njeh të drejtën e protestës dhe grevës si të drejta të garantuara me legjislacion, por konsideron se ndërprerjet e vazhdueshme të procesit arsimor kanë dëmtuar dhe po dëmtojnë procesin e rregullt mësimor dhe mësim-nxënien e fëmijëve. Vonesat në procesin e të nxënit dhe edukimit të fëmijëve do të lënë pasoja domethënëse në zhvillimin e tyre”, thuhet në reagimin e tyre.
Këshilli për Mbrojtjen e të Drejtave e të Lirive të Njeriut thotë se nxënësit nuk duhet dhe nuk mund të viktimizohen për shkak të mosmarrëveshjeve të Qeverisë së Kosovës dhe SBASHK-ut..