Përmes një komunikate për media, Policia e Kosovës njofton se ka parandaluar dy raste të kontrabandimit me mallra. Njësia e Task Forcës me datë 29 dhe 30 nëntor ka kryer një kontroll të rreptë në terren dhe disa operacione, raporton Kosova Post.
Sot në fshatin Breznicë, Njësia Task Forcës ka dyshuar për hyrjen e një automjeti në territorin e Republikës së Kosovës, i njëjti është ndalur në Gjilan rreth orës 16:05. Ashtu siç raportohet nga Policia, shoferi i automjetit me iniciale A.A ka qenë i njohur nga Policia për kryerjen e veprave të ndryshme penale. Me të ndalur veturën, Policia ka ushtruar kontroll të menjehershëm ku ka gjetur 300 kilogramë fruta të thata në bagazhin e veturës dhe ulëseve prapa të cilat nuk kishin asnjë dokument përcjellës se nga e kanë origjinën dhe përmbajtjen, të njëjtat dyshohet se janë sjellur nga Serbia.
Ndërsa dje rreth orës 21:00 e mbrëmjes, Njësia e Task Forcës ka hasur në një veturë në ardhje nga Maqedonia e Verit e cila ka qenë e ngarkuar me mall të kontrabanduar dhe është ndalur në fshatin Stubëll, komuna e Vitisë.
Shoferi me inicialet K.M ka qenë duke vozitur me veturën BMW X5 ngjyrë hiri me targa vendore, ndërsa përgjegjës i mallit ka qenë i dyshuari me inicialet J.K. Menjëherë pasi është ndalur vetura, Njësia e Task Forcës ka kryer një kontroll, me ç’rast ka gjetur 15 thasë duhan të përpunuar që dyshohet se janë sjellur nga Maqedonia e Veriut.
Sipas komunikatës, thuhet se malli ishte në plan të dërgohet tek një person në një fshat të Vitisë. Lidhur me rastin, Njësia e Task Forcës ka kryer kontroll edhe në shtëpinë e personit të tretë të përfshirë ku ka gjetur edhe 10 thasë tjerë duhan të njëjtë.
Me urdhër të Prokurorit të Shtetit, rasti është iniciuar si “Kontrabandim me mallra”, ndërsa malli të sekuestrohet dhe të dërgohet në Doganë./KosovaPost/
