Kryetari i Listës Serbe, Goran Rakiq, ka folur për media pas takimit me presidentin Aleksandër Vuçiq ku ka thënë se beson që BE-ja do ta përmbushë premtimin e saj të dielën që referendumi i Serbisë të mbahet në Kosovë.
“Ne besojmë në BE, por do ta shohim të dielën nëse do t’i përmbushë premtimet e saj. BE-ja dhe pesë shtetet e QUINT-it kanë dalë me deklaratë dhe qartë u thanë autoriteteve në Prishtinë që referendumi të mbahet në Kosovë”, ka thënë Rakiqi.
Rakiqi ka thënë se EULEX-i do ta tregojë fytyrën e tij të dielën.
“Në Prishtinë e kundërshtojnë ‘Open Balkan’, tani ata nuk po na lejojnë që të shkojmë në BE, ky është hapi që Brukseli po e kërkon. Hapja e kapitujve dhe referendumi po mbahet sepse BE-ja po e kërkon. Ne kërkojmë nga BE-ja që të kalojë nga fjalët tek veprimet. Të dielën EULEX-I do ta shfaq fytyrën e tij”, ka thënë Rakiq pas takimit.
Në takimin e Listës Serbe me presidentin Vuçiq ka qenë i pranishëm edhe nënkryetari i këtij subjekti, Milan Radojiçiq i sanksionuar së fundi nga Departamenti Amerikan i Thesarit.