Rrjeti i Gruas të Kosovës e ka uruar Vjosa Osmanin për pozitën Presidente e Republikës së Kosovës.
Rrjeti i Gruas, konsideron se, zgjedhja e Osmanit nuk shënon datë të rëndësishme vetëm për institucionin e Presidencës, por ajo jep shpresë dhe forcë edhe për fuqizimin e mëtejshëm të grave në politikë dhe procese vendimmarrëse në shoqërinë tonë.
“Ardhja juaj në krye të një prej tri institucioneve më të rëndësishme bart në vete mesazhin e domosdoshëm drejt mundësisë reale të rritjes së pjesëmarrjes së grave në politikë.Përvoja juaj afatgjate në politikë dhe mbështetja e vazhdueshme për të drejtat e grave në Kosovë do të shërbejë si inkurajim për të gjitha vajzat që duan të jenë pjesë e politikës. Po ashtu, ajo është frymëzim dhe për ne, si organizatë që përpiqet çdo ditë për barazi gjinore, duke mbajtur “Gratë në Politikë dhe Vendimmarrje” si program kyç të këtij rrugëtimi”, thuhet në komunikatën e RrGK-së.
Tutje thonë nga Rrjeti i Grave se kjo fitore mund të arrihet vetëm së bashku, e me solidaritet.
“Kujtojmë se zgjedhja juaj po vjen vetëm pak kohë pas zgjedhjeve parlamentare të 14 shkurtit 2021, zgjedhje të cilat shënuan numrin më të madh të grave të zgjedhura në Kuvend. E megjithëkëtë, të drejtat dhe prania e barabartë e grave, jo vetëm në politikë e sferën publike, ende mbeten një betejë që kërkon punë e angazhim deri në fitore.Këtë fitore, mund ta arrijmë vetëm së bashku. Së bashku e me solidaritet. Kësisoj, për një shoqëri më të barabartë, përveç urimit, RrGK njëherit shtrin dorën e bashkëpunimit dhe solidaritet me ju përgjatë gjithë mandatit presidencial”, përfundon komunikata e ReGK-së.
