Zëdhënësja e re e Shtëpisë së Bardhë, Karine Jean-Pierre, e cila e mori këtë post nga Jen Psaki ditën e premte, mbajti për herë të parë një konferencë shtypi, transmeton Kosova Post.
Lidhur me qëndrimin e Ankarasë ndaj anëtarësimit të Suedisë dhe Finlandës në NATO, Karine Jean-Pierre theksoi se sekretari amerikan i Shtetit, Antony Blinken, u takua një ditë më parë në kryeqytetin Berlin të Gjermanisë me ministrin e Punëve të Jashtme të Turqisë, Mevlut Çavusoglu.
“Anëtarësimi në NATO kërkon një proces dhe ne jemi të bindur se konsensusi për këtë çështje do të arrihet”, tha ajo.
Gjatë konferencës për shtyp në Berlin, shefi i diplomacisë amerikane, Blinken, bëri këto komente lidhur me procesin e anëtarësimit të Suedisë dhe Finlandës në NATO: “Kam pasur rastin ta diskutoj këtë çështje me ministrin e Jashtëm (turk). Nuk do ta përshkruaj takimin, por do të mjaftohem të them se ka një konsensus të fortë për aderimin e Finlandës dhe Suedisë në Aleancë. Ka ende diskutime që vazhdojnë për dallimet mes Turqisë, Finlandës dhe Suedisë. Përfundimisht, jam i bindur se do të arrijmë një konsensus për anëtarësimin e këtyre dy vendeve (në NATO).”
Pozicioni i Turqisë kundër anëtarësimit të Finlandës dhe Suedisë në NATO ishte gjithashtu në rendin e ditës së Pentagonit.
Zëdhënësi i Departamentit amerikan të Mbrojtjes, John Kirby, tha se “Turqia ka disa rezerva për anëtarësimin Suedisë në Aleance për shkak të pranisë së organizatës terroriste separatiste, PKK, në këtë vend”.
“PKK-ja njihet si organizatë terroriste nga Shtetet e Bashkuara dhe të gjithë anëtarët e NATO-s”, shtoi ai.
I pyetur “nëse SHBA-ja do ta këshillonte Suedinë për të ndërmarrë hapa kundër PKK-së”, John Kirby u përgjigj duke thënë se kjo nuk është një çështje, për të cilën Departamenti Amerikan i Mbrojtjes do të komentonte.
“Ne jemi ende duke u përpjekur të qartësojmë pozicionin e Turqisë për këtë çështje. Ata (turqit) janë aleatë të vyer të NATO-s. ndërkaq, as Suedia dhe as Finlanda nuk i kanë dorëzuar ende zyrtarisht aplikimet e tyre në NATO. Kemi një proces këtu dhe ne jemi duke përparuar hap pas hapi në këtë proces. Sidoqoftë, është e pamundur që ne të diktojmë nga Pentagoni se si do të jetë politika e jashtme e një shteti tjetër”, theksoi zëdhënësi i Departamentit amerikan të Mbrojtjes.
Vlen të kujtojmë se Presidenti Recep Tayyip Erdogan ripohoi të hënën mbrëma që Turqia nuk do t’i jepte dritë jeshile anëtarësimit në NATO të vendeve, të cilat vendosin sanksione ndaj saj.trt.
