Zëdhënësi i Departamentit amerikan të Mbrojtjes (Pentagon), John Kirby, tha në një deklaratë se sulmet u urdhëruan nga Presidenti Joe Biden në përgjigje të sulmeve të fundit kundër personelit amerikan dhe koalicionit në Irak, transmeton Kosova Post.
“Në mënyrë të veçantë, sulmet shkatërruan shumë objekte të vendosura në një pikë të kontrollit kufitar të përdorur nga disa grupe të mbështetura nga Irani, përfshi këtu Kata’ib Hezbollah (KH) dhe Kata’ib Sayyid al-Shuhada (KSS)”, theksoi ai.
Duke nënvizuar se sulmet ajrore u kryen në konsultim me partnerët e koalicionit kundër organizatës terroriste DAESH, zëdhënësi Kirby vuri në pah se ato u ndërmorën në mënyrë proporcionale për të mos përshkallëzuar situatën e përgjithshme në Irak e Siri.
Sulmet e së enjtes janë aksioni i parë ushtarak që dihet të jetë kryer nga Biden prej fillimit të mandatit në janar. Kundërpërgjigjja e Uashingtonit erdhi pas sulmeve të shumta me raketa ndaj forcave amerikane në Irak.
Të hënën, në incidentin e fundit, një sulm me raketa shënjoi Zonën e Gjelbër mjaft të fortifikuar të Bagdadit, e cila pret shumicën e misioneve diplomatike të huaja duke përfshirë edhe Ambasadën e Shteteve të Bashkuara të Amerikës.
Zona e Gjelbër ka qenë rregullisht nën sulme raketore që prej atentatit vdekjeprurës në janar të vitit të kaluar kundër gjeneralit iranian, Qasem Soleimani, në një sulm me dron amerikan.
SHBA-ja fajëson milicinë shiite të mbështetur nga Irani për sulme të tilla me raketa ndaj misioneve të huaja diplomatike dhe trupave amerikane e të huaja në Irak./trt
