Sekretari i përgjithshëm i Kombeve të Bashkuara (OKB), Antonio Guterres, ka bërë thirrje për më shumë qasje humanitare në Sirinë e goditur nga konflikti për të arritur më shumë njerëz që kanë nevojë për ndihmë.
Duke folur para gazetarëve në selinë e OKB-së për të shënuar 10-vjetorin e luftës civile siriane, Guterres tha se Siria “ka rënë në faqet e para pas një dekade të konfliktit dhe akoma situata mbetet një ankth i gjallë”. “Rreth 60 për qind e sirianëve janë në rrezik nga uria këtë vit. Është e domosdoshme që ne të vazhdojmë të arrijmë të gjithë sirianët që kanë nevojë për ndihmë humanitare. Nevojitet më shumë qasje humanitare”, tha Guterres.
Ai tha se dërgesat e intensifikuara ndër-kufitare janë thelbësore për të arritur të gjithë në nevojë kudo që janë. Shefi i OKB-së po ashtu u zotua që trupi ndërkombëtar do të vazhdojë ndjekjen e saj për një zgjidhje politike në përputhje me rezolutën 2254 të Këshillit të Sigurimit të OKB-së, duke përmendur hapin e parë në atë rrugë që duhet të jetë përparimi i qartë në Komitetin Kushtetues Sirian.
Guterres tha se palët siriane kanë mundësinë të demonstrojnë një gatishmëri për të gjetur baza të përbashkëta. “Kjo është më e mira, që do të çojë në një zgjidhje që plotëson aspiratat legjitime të të gjithë sirianëve”, tha ai, duke shtuar se është një proces në të cilin burrat dhe gratë siriane duhet të luajnë pjesën e tyre të plotë.
Siria është shkatërruar nga lufta civile që nga fillimi i vitit 2011 kur regjimi i Bashar al-Assadit u përplas me protestat pro-demokratike. Sipas vlerësimeve të OKB-së, si pasojë e konfliktit civil qindra mijëra persona janë vrarë dhe mbi 10 milionë janë zhvendosur.
