I rikthehemi edhe një herë ndërrimit të stinëve, por nga një këndvështrim tjetër. Në Bresanë të Dragashit shumica e banorëve nuk e kanë festuar fare Vitin e Ri. Përveç Vitit të Ri, ditëlindjet festohen rrallë.
Asnjë shtëpi, dyqan apo objekt tjetër dhe as rrugët e fshatit nuk janë dekoruar me drita, ndonëse pak ditë kanë mbetur deri në ndërrimin e moteve. Në fshatin Bresanë të Opojës, në rajonin më jug perëndimor të Kosovës, nuk festohet Viti i Ri, përcjell KosovaPost.
Banorët e këtij fshati deklarohen qind për qind të besimit islam dhe sipas fesë, siç thonë ata, Viti i Ri nuk preferohet të festohet.
Madje, në dyqanet e këtij fshati nuk mund të gjesh as alkool. Shitësit e dyqaneve deklarojnë se shitjen më të madhe të gjësendeve të tjera, si: ëmbëlsirat, pijet joalkoolike, pemët etj e kanë për festën e Bajramit të Madh dhe atij të Vogël, si dhe për Vitin e Ri Mysliman.
Është koha e faljes së drekës sipas rregullave të lutjes në fenë islame dhe banorët e Bresanës dalin një pas një nga xhamia e fshatit, duke u ngjitur rrugëve për të arritur tek shtëpitë e tyre. Në mesin e atyre që kryejnë lutjen ka pleq e të rinj.
Tradita e moskremtimit të ndërrimit të moteve banorët e shpjegojnë se kjo ka qenë gjithmonë. Ata thonë se ky fshat kurr nuk e ka festuar Vitin e Ri./KosovaPost/.