Gjykata Themelore në Prizren, të hënën, i shpalli fajtor ish-drejtorin për Ekonomi dhe Financa Ertan Simitçi dhe ish-ushtruesin e detyrës Zenel Ahmetaj, për veprën penale “Keqpërdorimi i pozitës apo autoritetit zyrtar” .
Drejtësia Sot, raporton se gjykata dy të akuzuarit i dënoi me nga 6 muaj burgim me kusht, dënim ky i cili nuk do të ekzekutohet nëse të akuzuarit nuk kryejnë vepër të re penale brenda periudhës verifikuese prej 1 viti.
Gjithashtu, të akuzuarit në mënyrë solidare nga gjykata janë obliguar që ti paguajnë shpenzimet procedurale në shumën prej 600 euro si dhe 120 euro për ekspertizën financiare.
Ndërsa, nga 50 euro secili veç e veç, në emër të fondit për kompensimin e viktimave të krimit, janë obliguar ti paguajnë, në afat prej 15 ditësh pas plotfuqishmërisë së aktgjykimit.
Sipas aktakuzës, Ertan Simitçi akuzohet se në periudhën kohore janar – dhjetor të vitit 2016 në Prizren, në cilësinë e Drejtorit në Drejtorinë për Ekonomi dhe Financa në Komunën e Prizrenit, duke shfrytëzuar detyrën apo autoritetin zyrtar i tejkalon kompetencat e tij zyrtare duke keqpërdorë pasurinë publike.
Qëllimi i këtyre veprimeve ishte që të përfitoj çfarëdo dobie për persona tjerë juridik: TV Opinion, TV Besa dhe TV Prizreni, duke mos e përmbushur detyrën e përcaktuar me ligj, pa ndonjë procedurë të tenderimit në kundërshtim me Ligjin e Prokurimit Publik, Ligjin mbi Menaxhimin e Financave Publike dhe Përgjegjësive si dhe Rregulloren e Thesarit, për transmetimin e spoteve reklamuese, rreth pagesave të tatimit në pronë në Komunën e Prizrenit.
I njëjti ka lidhur kontratë me TV Opinion, TV Besa dhe me TV Prizreni, ku tre televizionet arrin shumën prej 17.700 euro në vit.
Ndërsa, i akuzuari Zenel Ahmetaj, akuzohet se në periudhën kohore janar – dhjetor të vitit 2015 në Prizren, në cilësinë e ushtruesit të detyrës të Drejtorit në Drejtorinë për Ekonomi dhe Financa në Komunën e Prizrenit, duke shfrytëzuar detyrën apo autoritetin zyrtar, ka tejkaluar kompetencat e tij zyrtare duke keqpërdorë pasurinë publike.
Kështu, ai me qëllim që të përfitoj çfarëdo dobie për persona tjerë juridik: TV Opinion, TV Besa dhe TV Prizreni, duke mos e përmbushur detyrën e përcaktuar me ligj, pa ndonjë procedurë të tenderimit në kundërshtim me Ligjin e Prokurimit Publik, Ligjin mbi Menaxhimin e Financave Publike dhe Përgjegjësive si dhe Rregulloren e Thesarit, lidh kontrata për transmetimin e spoteve reklamuese për nevojat e Drejtorisë së Financave të Komunës së Prizrenit.
Në këtë mënyrë, Zenel Ahmetaj, lidh kontrata me TV Opinion, TV Besa dhe TV Prizreni, për tre televizionet arrin shumën prej 300 euro në vit.
Drejtësia Sot, ka raportuar që nga fillimi gjithë rrjedhën e këtij shqyrtimi gjyqësor:
Monitorues: Lorik KABASHI