Ish nënkryetari i Lidhjes Demokratike të Kosovës Agim Veliu i ka reaguar kryetarit aktual të LDK-së Lumir Abdixhiku në lidhje me deklaratat e këtij të fundit se presidentja e Kosovës Vjosa Osmani “nuk është e të gjithëve”, shkruan Kosova Post.
Veliu, ka shkruar në Facebook, se ‘Abdixhikut i është dashur një vit që të kuptojë një gjë të tillë’
Për Veliun, sjellja e Osmanit ndaj Abdixhikut ngjanë me atë thënien “E kapërceva lumin…”
Reagimi i plotë:
Është dashur të kaloj një vit që Lumiri ta pranoj se Vjosa Osmani nuk është presidente e të gjithëve.
E tha se me presidenten ka vetëm një komunikim institucional.
Shumë normale kjo.
Derisa e bëri presidente kishte komunikime të përditshme.
Një presidente që ka ardhur në pushtet nën petkun e VV-së dhe e përkrahur nga disa deputetë të LDK-së të ndikuar nga Lumiri, pra pa konsensus të gjerë, nuk mund të jetë e të gjithëve! E VV-së po, pa dyshim, por pse jo e Lumirit dhe e kompanisë së tij, kjo është pak e çuditshme!
Nuk është për t’u habitur pse Vjosa sillet ndaj Lumirit sipas asaj thënies “E kapërceva lumin…”
Fundja, askush nuk ka pritur se do të ndryshojë Vjosa, që ka shkëlqyer si politikane përçarëse dhe konfliktuoze, deri në përpjekjen për shkatërrimin e partisë që e rriti.