Brenda Nebihu
Për të mbrojtur të drejtën legjitime qytetare Lëvizja Vetëvendosje organizoi një peticion me kërkesën duam zgjedhje. Ky peticion ka filluar nga ora 10:00, ku qytetarët mund të nënshkruajnë deri në ora 18:00, nëpër sheshet e të gjitha komunave të Kosovës.
Në lidhje me këtë peticion u deklarua për Kosova Post Deputeti i Lëvizjes Vetëvendosje Rexhep Selimi, i cili tha se qytetarët po kërkojnë vazhdimisht të drejtën e tyre, e jo vendimet jo kushtetuese siç ishte dekreti i presidentit Thaçi.
‘Qytetarët me anë të këtij peticioni tregojnë edhe njëherë, që nuk pranojnë që askush tua rrëmbej fitoren, duke kërkuar të drejtën e tyre për të vendosur ata, dhe jo kushdo, aq më tepër me rrugë jo kushtetuese, siç ishte dekreti i presidentit, apo me vendime të padrejta siç ishte vendimi i gjykatës kushtetuese. Ne sot këtu jemi aty ku e kemi vendin, në anën e qytetarëve për të mbrojtur interesat e qytetarëve të republikës së Kosovës’ -Tha Selimi.
Ndër të tjera i pyetur për protestat të cilat janë paralajmëruar, Selimi nuk ka precizuar saktë datën e mbajtjes se tyre, duke shtuar se përjashtimi i protestave nga të tjerët është i gabuar.
‘Kushdo që i përjashton protestat sidomos në rastet e tilla gabon, edhe ne nuk i përjashtojmë protestat dhe nuk duam të gabojmë, nuk ka ndonjë datë të caktuar që tani se cila ditë dhe kohë do të jenë protestat’ deklaroi Selimi.
Selimi kur është pyetur për pjesëmarrje në seancën e nesërme ka thënë se do jenë në anën e qytetarëve.
‘Nesër sërish ne do të jemi në anën tonë, në anën e të drejtës së qytetarëve, për të zgjedhurit e tyre dhe po ashtu në përputhje me mandatin e deputetit dhe njëkohësisht edhe në konform qëndrimeve tona politike, andaj edhe nesër do të jemi në detyrë’ tha Selimi, duke mos dhënë detaje për mënyrën e protestimit , por shtoj se veprimet e tyre do jenë në përputhje me qëndrimet e Vetëvendosjes.
‘Edhe në qoftëse kemi vendim ne nuk mund të i ndajmë me ju, sepse ne nuk mund të jemi të parashikueshëm dhe të kalkulueshëm nga ana e komponentëve tonë politik.
“Mandati jonë dhe e drejta jonë do të shihet nesër në përputhje me detyrat që i kemi ne si deputet dhe me përputhje me qëndrimet e Lëvizjes Vetëvendosje” përfundoi shefi i grupit Parlamentar të Vetëvendosjes, Rexhep Selimi. Kosovapost.net
