Qeveria e Kosovës është duke shqyrtuar dhe po përgatitet për marrjen e masave të reja lidhur me kufizimin e lëvizjes së qytetarëve, si masë për parandalimin e përhapjes së Coronavirusit.
E masat e reja po shqyrtohen pasi këto aktualet dolën të jenë në kundërshtim me Kushtetutën dhe sipas një vendimi të Gjykatës Kushtetuese mund të jenë në fuqi më së largu deri më 13 prill.
Vendimi i Qeverisë për kufizimin e lëvizjes së qytetarëve në orare të caktuara ishte i bazuar në dy ligje, Ligjin për parandalimin e sëmundjeve ngjitëse dhe Ligjin për shëndetësi.
Mirëpo Gjykata Kushtetuese vlerësoi se këto dy ligje nuk e autorizojnë Qeverinë që të kufizojë lirinë e lëvizjes dhe të drejtat e garantuara me Kushtetutë, mirëpo e autorizojnë Ministrinë e Shëndetësisë që të marrë masa në ato ligje.
Kështu vendimi i 23 marsit 2020 i Qeverisë së Kosovës për të kufizuar lëvizjen e lirë të qytetarëve doli se nuk është në përputhje me Kushtetutën, dhe të njëjtin Kushtetuesja vendosi ta shpallë të pavlefshëm. Madje është specifikuar se masat kufizuese mund të jenë në fuqi më së largu deri më 13 prill.
Të gjendur në një situatë të tillë kur kufizimet e lëvizjes nuk mund të aplikohen si deri më tani dhe rrezikut nga përhapja e koronavirusit Qeveria e Kosovës është duke u përgatitur për marrjen e masave të reja.
Në fakt qeveria në detyrë është duke shqyrtuar masën e kufizimit të lëvizjes së lirë vetëm në zonat e caktuara.
Zëvendëskryeministri në detyrë, Haki Abazi, ka thënë për FaktePlus se institucionet përgjegjëse janë duke punuar dhe kufizimet e ardhshme kryesisht do të bëhet bazuar në Ligjin për parandalimin e sëmundjeve ngjitëse.
“Të gjitha masat që janë marrë do të mbesin në fuqi përveç asaj që është kthyer nga Gjykata Kushtetuese dhe do vendosen masat e kufizimit në bazë të Ligjit të parandalimit të sëmundjeve ngjitëse të cilën kompetencë e ka Ministria e Shëndetësisë”, ka thënë Abazi.
Ai ka theksuar se kufizimi i ri i lëvizjes do të vlej vetëm për vendet apo komunat e caktuara, ku ka raste me Coronavirus.
“Do të thotë do të bëhet në pjesë të caktuara të vendit dhe jo shpallje e përgjithshme në tërë territorin e vendit, sepse ashtu është rekomanduar prej vendimit të Gjykatës Kushtetuese”, ka thënë Abazi.
