“Squid Game” ka bërë histori sërish duke u bërë kështu seriali i parë televiziv në një gjuhë jo angleze, i cili ka marrë një nominim për çmimin e “Screen Actors Guild” (SAG), përcjell KosovaPost.
Por, ky nuk është ai suksesi i vetëm. Seriali “Squid Game” është gjithashtu seriali i parë korean që merr këtë nominim.
Seriali me historinë e tij të veçantë dhe personazhet që janë kthyer në më të preferuarit e publikut është i përzgjedhur për ansamblin më të mirë të serialeve dramatike, krahas “The Morning Show”, “Succession”, “The Handmaid’s Tale” dhe “Yellowstone”.
Yjet e “Squid Game”, Lee Jung-jae dhe Jung Ho-yeon gjithashtu morën nominime për aktorin më të mirë dhe aktoren më të mirë në një serial të zhanrit dramë.
Çmimet SAG, të cilat votohen nga aktorë të tjerë, shihen si një nga pararendësit kryesorë për shfaqjet e mëvonshme të çmimeve.
Vlen të përmendet se seriali korean u nominua dhe fitoi disa çmime edhe në ceremoninë “e heshtur” të “Golden Globes” disa ditë më parë. Një ndër çmimet e rrëmbeu dhe aktori O Yeong-su, i njohur si numri 001, si aktori më i mirë në një rol mbështetës.
Pika historike e “Squid Game” vjen tre vjet pasi thrilleri fitues i “Oscar” i Bong Joon-ho, “Parasite”, u bë projekti i parë në gjuhën jo-anglisht që fitoi një çmim SAG për ansambël filmash.
Gjithashtu është paralajmëruar se do të ketë edhe një sezonë të re të serialit tashmë më të famshëm korean dhe më tej.
