Në kuadër të stërvitjeve ushtarake të flotës ruse, për herë të parë në historinë moderne, operojnë së bashku tri anijet luftarake më të fuqishme ruse – me raketa të projektit 1164 “Atlant”, shkruan gazeta ‘Izvestia’, transmeton Kosova Post.
Luftanija “Varjag” nga Flota e Paqësorit dhe “Marshal Ustinov” nga Flota Veriore tani më ndodhen në Detin Mesdhe.
Sipas burimeve të brendshme të gazetës ruse në Ministrinë e Mbrojtjes, së shpejti atyre do t’u bashkohet edhe anija luftarake “Moska” – anija komanduese e Flotës së Detit të Zi.
Mesdheu është terren i njohur për kryqëzorin “Moska”. Nga shtatori 2015 deri në janar 2016, ajo ishte në krye të grupit të përhershëm operacional të Marinës Ruse në pjesën lindore të Detit Mesdhe, duke mbrojtur bazën Hmejmim dhe Tartus nga sulmet ajrore.
Sipas po të njëjtave burime, thuhet se edhe gjatë muajit shkurt do të zhvillohen një sërë stërvitjesh ushtarake në të gjitha fushat në kuadër të flotës.
Fokusi kryesor i manovrës është ushtrimi i veprimeve të Marinës dhe Forcave Ajrore dhe Hapësinore për të mbrojtur interesat kombëtare të Rusisë në ujëra në mbarë botën, si dhe lufta kundër kërcënimeve ushtarake nga deti.
Në stërvitjet ushtarake marrin pjesë më shumë se 140 anije luftarake dhe logjistike, më shumë se 60 avionë, 1000 njësi pajisje ushtarake dhe 10000 ushtarë./Kosova Post/
