Forcat e Armatosura të Ukrainës kanë kryer stërvitje ushtarake duke përdorur sisteme raketahedhëse pranë Krimesë së aneksuar ilegalisht nga Rusia, transmeton Kosova Post.
Në një deklaratë nga Forcat e Armatosura të Ukrainës thuhet se në stërvitje janë përdorur sisteme raketahedhëse shumëtytëshe të modelit BM-21 “Grad”.
Stërvitja, e cila është kryer në rajonin Kherson pranë Krimesë, thuhet se është realizuar me qëllim që ushtria të përgatitet për ndryshime të papritura të situatës.
Ndryshe, Rusia aneksoi Krimenë në vitin 2014, duke shkaktuar rritje të tensioneve me Ukrainën. Situata u përkeqësua nga separatistët e mbështetur nga Rusia në rajonin kufitar lindor Donbas dhe grumbullimi i fundit ushtarak rus në afërsi të kufirit me Ukrainën.
Komuniteti ndërkombëtar e cilëson si të paligjshëm aneksimin e Krimesë nga Rusia.AA
