Një gazetar meksikan është vrarë ditën e djeshme pranë banesës së tij në qytetin meksikan Tijuana, në kufi me Shtetet e Bashkuara, përcjell KosovaPost.
Margarito Martinez, 49 vjeç u sulmua me armë zjarri shumë pranë shtëpisë së tij, ndërsa ishte duke shkuar për punë ku u qëllua nga persona të armatosur. Martinez, gazetar në disa media, përfshirë të përjavshmen ‘Zeta’ të Tijuana, kishte marrë kërcënime.
Kjo ngjarje vjen vetëm pak ditë pas vrasjes së një tjetër gazetari dhe aktivisti të mediave sociale, Jose Luis Gamboa, i cili vdiq në spital disa ditë pasi u godit me thikë në shtetin lindor të Veracruz më 6 janar.
Të paktën shtatë gazetarë u vranë në Meksikë në vitin 2021, sipas një numërimi të AFP, megjithëse nuk është përcaktuar nëse të gjitha vrasjet ishin të lidhura me punën e tyre. Më shumë se 100 reporterë janë vrarë që nga viti 2000 në Meksikë dhe vetëm një pjesë e krimeve kanë rezultuar në dënime.