Presidenti serb, Aleksandar Vuçiq ka thënë se gjithçka që është nënshkruar në dialogun ndërmjet Kosovës dhe Serbisë dhe që është nënshkruar edhe nga përfaqësuesit e Bashkimit Evropian, duhet të zbatohet.
Ky, Vuçiqi tha se “nuk është qëllimi përfundimtar” dhe se “nuk ka rëndësi” se kur do të arrihet marrëveshja.
“Këto janë katër marrëveshje. Ne tashmë kemi nënshkruar gjithçka dhe, natyrisht, është nënshkruar nga përfaqësuesit e Bashkimit Evropian dhe duhet të zbatohet. Dhe ky nuk është qëllimi përfundimtar. Qëllimi përfundimtar është që serbët dhe shqiptarët të jetojnë se bashku, për të jetuar shumë më mirë dhe për të respektuar, pa armiqesi. Nuk e kam në plan të flas për fajin e askujt, nuk ka rëndësi nëse do të arrihet për tre muaj apo tre vjet, por nëse ia dalim do të jetë një sukses historik”, tha Vuçiq në një intervistë për Euroneës në gjuhën serbe.
Ai tha se Serbia është “gati” për të bërë përpjekje për gjetjen e një kompromisi.
“Sigurisht, të dyja palët kanë vijat e tyre të kuqe dhe nuk mund ta mohoj këtë, por ne, besoj se të dyja palët, duhet të bëjmë shumë për ta normalizuar situatën mes kombeve tona, popujve tanë dhe duke pasur parasysh këtë, unë besoj se është në interes të të dyja palëve të sigurojnë qarkullimin e lirë të mallrave, njerëzve dhe kapitalit. Ne duhet të punojmë me shumë zell për këtë, si dhe për zbatimin e të gjitha marrëveshjeve të mëparshme”, tha Vuçiq.
I pyetur nëse Serbia është e gatshme t’ia bëjë disa lëshime palës kosovare kur bëhet fjalë për anëtarësimin në Këshillin e Europës, Vuçiq tha se “ata tashmë e kanë filluar atë procedurë në Këshillin e Europës, pa pyetur Serbinë. dhe nuk u duhet Serbia për këtë”.
Megjithatë, ai tha se ka rregullore dhe plan të propozuar nga gjermanët dhe francezët në lidhje me anëtarësimin në organizatat ndërkombëtare, duke shtuar se për këtë u ka kthyer përgjigje presidentit francez, Emmanuel Macron dhe kancelarit gjerman, Olaf Scholz.
“Ata morën përgjigjen time për këtë, unë i thashë (Emanuel) Macronit dhe (Olaf) Szholzit drejtpërdrejt se çfarë mendoj për pranimin e Kosovës në Kombet e Bashkuara dhe disa gjëra të tjera. Por ne jemi të gatshëm të flasim për çështje të tjera, ne jemi gjithmonë të gatshëm dhe gjithashtu duhet të diskutojmë disa ligje që duhet të miratohen dhe këtë do ta diskutoj në Ohër me bashkëbiseduesit e mi dhe disa njerëz të tjerë. Por ne jemi të gatshëm të diskutojmë shumë çështje dhe ata i dinë vijat e mia të kuqe”, tha Vuçiq dhe përsëriti se. ai nuk dëshiron të flasë për këtë publikisht sepse dëshiron të lë shumë hapësirë për zgjidhje të mundshme kompromisi.
Duke iu përgjigjur pyetjes nëse kjo do të thotë se ka hapje, gjegjësisht se nuk mbyllet dera për mundësinë që Serbia të thotë “po” për anëtarësimin e Kosovës në OKB, Vuçiq tha: “Në disa organizata, po. Nuk po flas për Këshillin e Europës, ata tashmë e kanë filluar këtë pa ne”.
