Tre gazetarë të tjerë palestinezë janë vrarë në sulmet izraelite në Rripin e Gazës, duke e çuar numrin e përgjithshëm të tyre që nga tetori i vitit të kaluar në të paktën 180, transmeton Anadolu.
Zyra për media e qeverisë në Gaza i identifikoi gazetarët e vrarë si Saed Radwan nga televizioni lokal Al-Aqsa, Hamza Abu Salmiya nga agjencia e lajmeve Sanad dhe Haneen Baroud nga Fondacioni Al-Quds.
Zyra për media i bëri thirrje komunitetit ndërkombëtar dhe organizatave të mediave që të ndërhyjnë për “të penguar okupuesin dhe për ta ndjekur atë në gjykatat ndërkombëtare për krimet e vazhdueshme”, si dhe për t’i bërë presion Izraelit që të ndalojë gjenocidin e vazhdueshëm dhe vrasjen e gazetarëve palestineze.
Duke shpërfillur rezolutën e Këshillit të Sigurimit të OKB-së që kërkon një armëpushim të menjëhershëm, Izraeli ka vazhduar me ofensivën shkatërruese në Gaza që nga 1 tetori i vitit të kaluar.
Afër 43 mijë njerëz janë vrarë që atëherë, kryesisht gra dhe fëmijë, si dhe mbi 100 mijë të tjerë janë plagosur. Sulmi izraelit gjithashtu ka zhvendosur pothuajse të gjithë popullsinë e territorit mes një bllokade të vazhdueshme që ka çuar në mungesa të mëdha të ushqimit, ujit të pastër dhe ilaçeve.
Për veprimet në Gaza, Izraeli gjithashtu përballet me një çështje gjenocidi në Gjykatën Ndërkombëtare të Drejtësisë.
