Kryetari i LDK-së, Lumir Abdixhiku, ka thënë se mbrëmë ka qenë në Viti, në kremtimin e Vigjilia e Festës së të Ngriturit të Zojës në Qiell.
“Mbrëmë, me Sokolin, Antonin e Visarin, isha në Letnicë të Vitisë. Aty, nga mijëra qytetarë tanë, po kremtohej Vigjilia e Festës së të Ngriturit e Zojës në Qiell. Urova besimtarët katolik, pelegrinazhë nga e gjithë Kosova, por edhe jashtë saj, për këtë festë, siç urova dhe famullitarin Don Marjanin”, tha Abdixhiku.
Abdixhiku ka thënë se Letnica mbrëmë ishte model se si populli i Kosovës e ka gjetur rrugën e vet të bashkëjetesës së të ndryshmeve si pasuri e virtyt. Ai ka shtuar se toleranca është vlerë ndërshekullore.
“Letnica mbrëmë ishte frymëzim e model se si populli i Kosovës e ka gjetur rrugën e vet të bashkëjetesës së të ndryshmeve si pasuri e virtyt, larg duhmës së ndarjes e propagandës. Bashkëjetesa jonë, në vetvete, është pasuri kombëtare. Toleranca jonë është vlerë ndërshekullore. Kultivimi i dyjave është detyrim jo vetëm human por edhe patriotik”,shprehet kryetari Abdixhiku.
