Rreth 35 tonë drogë të llojit marihuanë dyshohet se janë sekuestruar në një aksion të gjerë të Prokurorisë për Ndjekjen e Krimit të Organizuar dhe Ministrisë së Brendshme të Maqedonisë së Veriut.
Sipas informacioneve jozyrtare, droga është konfiskuar në fabrikën për prodhimin e kanabisit mjekësor “Alfafarm”, si dhe në disa lokacione të tjera në Shkup dhe Strumicë.
Nga Ministria e Brendshme e Maqedonisë së Veriut, përmes një deklarate me shkrim, kanë bërë të ditur se aktivitetet policore lidhur me këtë aksion janë ende duke vazhduar, ndaj për momentin nuk mund të japin informata shtesë.
“Pas përfundimit të aksionit, opinioni do të njoftohet për sasinë e drogës së sekuestruar dhe detajet tjera të rastit”, thuhet në deklaratën e Ministrisë së Brendshme.
Ndërkohë, kryeministri i Maqedonisë së Veriut, Hristijan Mickoski, në një intervistë televizive ka deklaruar opinioni do të shokohet, kur do të mësoj për sasinë e sekuestruar.
Ky aksion vjen pas një rasti të mëhershëm në Serbi, ku u sekuestruan rreth 5 tonë marihuanë, e cila dyshohet se ishte prodhuar në Maqedoninë e Veriut.
