Shkruan: Fadil Pushkolli
Disa ish-komandantë të UÇK-së janë rreshtuar krah Hyqmetes, madje edhe pasi ajo ka deklaruar hapur se “nuk ka problem me Listën Serbe”. Kjo fjali është alarm kombëtar. Të thuash se Lista Serbe nuk është problem, do të thotë të normalizosh dorën politike të Beogradit në Kuvendin e Kosovës. Dhe rreshtimi përkrah kësaj logjike është fyerje e drejtpërdrejtë për luftën, dëshmorët dhe idealin e çlirimit.
Në emër të pazareve politike, po mbyllen sytë para rrezikut më të madh të brendshëm për shtetin, ndërkohë që një pjesë e ish-komandantëve po shndërrohen në mburojë morale për listat e LDK-së – lista që për vite të tëra kanë toleruar, ushqyer dhe bashkëjetuar me ndikimin serb. Ky nuk është unitet, ky është kapitullim politik.
UÇK-ja nuk u ngrit që sot të relativizohet Lista Serbe, as që emri i saj të përdoret për të larë deklarata që e cenojnë sovranitetin. Patriotizmi nuk matet me tituj lufte, por me qëndrim të qartë politik:
Lista Serbe është problem, ka qenë problem dhe do të mbetet problem përderisa është instrument i Serbisë në Kosovë.
