Ambasada e Turqisë në Kosovë ka organizuar pritje me rastin e 101 vjetorit të Republikës së Turqisë.
Në këtë pritje, që u organizua në Klan Arena, morën pjesë shumë personalitete, në mesin e të cilëve edhe kryeministri Albin Kurti.
Nikoqiri i mbrëmjes, ambasadori Tunç Angili, ka vlerësuar raportet mes vendit të tij dhe Kosovës.
Në një intervistë të shkurtër për Klankosova.tv, kryediplomati turk në Kosovë tha se bashkëpunimi bilateral po shkon në rrugë të shkëlqyeshme.
Ai veçoi bashkëpunimin në mbrojtje.
Raportet Turqi-Kosovë janë vërtetë të shkëlqyeshme në shumë fusha. Siç tha kryeministri Kurti në fjalimin e tij, bashkëpunimi në mbrojtje po përmirësohet dhe së fundmi kemi tentuar të përmirësojmë edhe bashkëpunimin ekonomik për të tërhequr më shumë investitorë nga Turqia. Pra, mund të them që raportet Turqi-Kosovë janë tani në një rrugë shumë të shkëlqyeshme”, tha Ambasadori Angili, raporton Klankosova.tv.
I pyetur për dialogun Kosovë-Serbi, të lehtësuar nga BE-ja, ai tha se Turqia është gjithmonë për zgjidhje të mosmarrëveshjeve rajonale përmes diplomacisë dhe dialogut, dhe asnjëherë përmes ushtrisë.
“Ne mendojmë që dallimet në rajon duhet të zgjidhen përmes diplomacisë dhe dialogut. Turqia ka një qëndrim parimor në këtë aspekt, mbështesim procesin e dialogut, mendojmë se nuk ka zgjidhje ushtarake për problemet ekzistuese. Duke e thënë këtë, është dialogu i lehtësuar nga BE-ja, dhe si vend i rëndësishëm i rajonit, Turqia e mbështet rolin e BE-së në këtë aspekt. Por gjithashtu, kemi raporte të mira me të gjitha vendet, përfshirë Serbinë, Shqipërinë dhe të gjitha vendet e rajonit. Besojmë se stabiliteti është në interes të të gjithëve”, u shpreh ai.
Ndërkaq, për sa i përket kontributit të Turqisë në KFOR, ai tha se nëse i kërkohet nga Komandanti aktual i KFOR-it, gjenerali italian Barduani, vendi i tij është i gatshëm të shtojë numrin e ushtarëve.
“Aktualisht, i takon komandantit të KFOR-it sepse ai vendos për madhësinë e KFOR-it. Komandanti aktual, Gjenerali Barduani do të vendosë për këtë, por Turqia me aleatët tjerë të NATO-s kontribuon në KFOR dhe jemi gjithmonë të gatshëm nëse vijnë kërkesa nga COMKFOR”, deklaroi ambasadori Angil.
