Bilanci i Interit 2024/25 tregon një ekip që është vetëm tri pikë larg kreut të Serie A (me një ndeshje për të luajtur) dhe ka grumbulluar 19 pikë në Champions League, dy më pak se lideri Liverpool, të njëjtat sa Barcelona dhe Arsenali. E gjitha kjo duke u përballur me garën më të rëndësishme duke iu besuar shpesh rotacioneve.
Projekti për t’u hakmarrë për humbjen në Stamboll 2023 ka të gjitha elementet që mund të kthehet në diçka konkrete.
Ndërkohë, ka edhe faktin se versioni i ri i Champions-it do të çojë fatkeqësisht në përjashtimin e ndonjë ekipi të madh para kohe. PSG-ja, për shembull, nëse kalon në 1/8, do të përballet me një mes Liverpool-it dhe Barcelonës, ashtu si dhe City, i cili që në fillim do të përballet me Bayernin ose Real Madrid-it.
Sigurisht, Interi ka rrezikun e një derbi të mundshëm që nga 1/8-ta: ose ai i vërteti me Milanin, ose ai i quajtur “derbi i Italisë” me Juventusin. Më pas, në çerekfinale, do të ketë gjithsesi ekipe të fuqishme si Bayern, Real, City, Atletico Madrid dhe Leverkusen, por ky Inter, objektivisht, ka treguar se ka diçka më shumë.
Ndërkohë, ka rikthyer Lautaron, i cili me ‘tripletën’ ndaj Monaco-s ka barazuar Mazzola-n në krye të golashënuesve të Interit. Gjithashtu, është skuadra e vetme italiane që ka siguruar vendin e drejtpërdrejtë në 1/8. Tashmë është e qartë që ka një grup me nivel të lartë dhe ka ardhur gjithashtu edhe ndërgjegjësimi që disa alternativa, të cilat në disa pozita dukeshin të pamjaftueshme, si ajo e regjisorit, mund të mbulohen mirë edhe nga ata që nuk duken të nivelit të duhur.
Asllani, për shembull, po tregon gjithnjë e më shumë rritje. Ka gjithashtu një aspekt të rëndësishëm për ata që duan të shkojnë larg në çdo kompeticion. Interi ka pranuar vetëm një gol në 8 ndeshje të luajtura këtë sezon në Champions: në humbjen e vetme në Leverkusen.
Inzaghi, më pas, e ka bërë ekipin e tij edhe më të vështirë për t’u lexuar nga kundërshtarët. Nëse rotacionet e vazhdueshme dhe aftësia për të lexuar situatat nga lojtarë të shkathtë dhe inteligjentë e kanë bërë Interin një formacion të vështirë për t’u përballur deri tani, tani ai ka fituar gjithashtu një aftësi gati kirurgjikale për të sulmuar vertikalisht, falë, sidomos, punës së sulmuesve dhe të atyre që shfrytëzojnë shpejtësinë nga krahu (dhe mund të jenë qendërmbrojtësit, po ashtu si dhe anësorët e mesfushës).
Maturia, fuqia morale, një lojë e memorizuar dhe e padukshme, një grup i ndërrueshëm dhe teknika individuale e lojtarëve të saj, pra, e vendosin Interin në podiumin e ekipeve favorite për këtë edicion të Champions League.s.n.
