“Kylian Mbappe ka shansin për të krahasuar trashëgiminë e tij me atë të Cristiano Ronaldo te Real Madridi”.
Ai që e bën këtë deklaratë është trajneri Carlo Ancelotti pas golit të shënuar nga francezi fundjavën e kaluar në kampionat.
Ky ishte goli i 33-të sezonal për Mbappe, që në sezonin e tij të parë me fanellën “los blancos” ka barazuar rekordin e yllit portugez, në sezonin e tij të parë te Real Madrid (sezoni 2009-2010). Dhe sezoni s’ka përfunduar ende për francezin.
“Është e vështirë të bësh krahasime mes lojtarëve të ndryshëm. Ajo për të cilën mund të shpresoj është që Mbappe të arrijë të fitojë dhe të bëjë atë që Cristiano Ronaldo ka arritur te Real Madridi”, tha trajneri italian.
Më tej, Ancelotti shtoi: “Mendoj se Kylian e ka aftësinë për ta bërë këtë gjë. Nëse ia del, ai do të jetë një legjendë e Real Madridit ashtu siç është edhe Cristiano Ronaldo”.
Deri tani, Mbappe ka shënuar 22 gola në kampionat, 7 në Champions League dhe nga një gol në Kupën e Mbretit, Superkupën e Spanjës, Superkupën UEFA dhe Kupën Ndërkontinentale të FIFA-s.
