KosovaNews, gjatë mbrëmjes të së martës, ka raprtuar ekskluzivisht për arrestimin e dy zyrtarëve të Postës së Kosovës në Rahovec, njëri nga të cilët është ish-kandidati i PDK-së për Rahovec, Bejtullah Deliu.
Lidhur me këtë, Posta e Kosovës ka njoftuar të mërkurën se ka autorizuar Inspektoratin Postar që të bëjë inspektim në atë zyrë dhe pas dyshimeve të bazuara është njoftuar edhe Policia e Kosovës, të cilët kanë ndërmarrë veprimet e tyre ligjore.
“Rastet e tilla janë të papranueshme për Postën e Kosovës dhe i sigurojmë qytetarët se janë duke u ndërmarrë veprime konform ligjeve në fuqi dhe akteve të brendshme të ndërmarrjes për rastin në fjalë.”, thuhet në njoftim.
Ndryshe, Policia e Kosovës, në mbrëmjen e së martës ka njoftuar se dy punonjës të postës kryesore në komunën e Rahovecit përfunduan në pranga nën dyshimin që të njëjtit kanë keqpërdorur pozitën e tyre zyrtare dhe kanë falsifikuar para.
Hetuesit e NjRHKEK-Gjakovë, kanë ndërmarrë veprimet e nevojshme hetimore duke grumbulluar të dhëna se një shumë prej 7000 (shtatë mijë) €, dyshohet të falsifikuara, janë futur në shërbim në postën e Rahovecit” bëri të ditur Policia.
“Policia ka arrestuar dy të dyshuar, B.D., (viti i lindjes 1983, mashkull kosovar, menaxher në postën në Rahovec) dhe H.D., (viti i lindjes 1989, mashkull kosovar). Në postë janë gjetur dhe konfiskuar, nën dyshimin se janë të falsifikuara, shuma e monedhave prej: 1362 X 2 =2 724 €, 970 X 1= 970 €, 1480 X 0.50=740€, gjithsej 4434 €. Po ashtu, dyshohet se 2566 € janë shpërndarë tek qytetarë që kanë kryer shërbime në këtë postë e të cilët janë mashtruar me këto veprime të të dyshuarve.
Ndërkohë, burime të KosovaNews bëjnë të ditur se të hollat në fjalë që janë falsifikuar, kanë qenë të destinuara për Skema Sociale, pra për qytetarët që marrin ndihmë sociale./KosovaNews/
