Hetuesit e Inspektoratit Policor të Kosovës kanë arrestuar zyrtarin policor në Istog, që plagosi tezakun e tij 16-vjeçar.
Sipas njoftimit të IPK-së atij i është caktuar masa e ndalimit për 48 orë si dhe është suspenduar nga detyra.
Nga IPK thuhet se viktima është plagosur në kokë dhe se rasti dyshohet se ka ndodhur në shtëpinë e zyrtarit policor i cili deri në këtë fazë të hetimit dyshohet se aksidentalisht ka shkrepur armën zyrtare.
“Personi i plagosur në këtë rast (i moshës 16 vjeçare i cili ka lidhje familjare me policin) është dërguar me urgjencë për trajtim mjekësor fillimisht në Spitalin Rajonal të Pejës e pastaj është dërguar në QKUK në Prishtinë. Bazuar në hetimet preliminare fillestare dyshohet se rasti ka ndodhur në shtëpinë e zyrtarit policor i cili deri në këtë fazë të hetimit dyshohet se aksidentalisht ka shkrepur armën zyrtare”, thuhet në komunikatën e IPK-së.
