Në mbledhjen e Konferencës së Kryetarëve, ku pas 5 muajve bojkot u rikthye me flamurin e të mandatuarit nga Rithemelimi për të drejtuar negociatat me mazhorancën, Gazment Bardhi, socialistët kanë pranuar kërkesat e opozitës për komisionet hetimore, çka i hap rrugë normalizimit të veprimtarisë së Kuvendit.
Mazhoranca është tërhequr nga vendimet e datës 12 Tetor 2023 për rrëzimin e komisionit hetimor për kontratat konçesionare në shëndetësi dhe për komisionin hetimor për ndërhyrjen e paligjshme në sistemin TIMS.
Në Konferencën e Kryetarëve është rënë dakord që opozita do të ushtrojë të drejtën për ngritjen e Komisioneve Hetimore, duke filluar nga ky sesion parlamentar. Është vendosur po ashtu në parim që të ngrihen të dyja komisionet e mësipërme, të cilat u bën shkak për nisjen e aksionit të opozitës dhe mosbindjes civile në Kuvend që nga 19 tetori.
Burime bëjnë me dije se Gazment Bardhi dhe Klotilda Bushka janë ligjvënësit e përzgjedhur për t’u marrë me diskutimet peer shqyrtimin e objektit dhe ngritjen e këtyre komisioneve hetimore. Përvec objektit pritet të përcaktohen edhe emrat e anëtarëve, ndërsa Konferenca e Kryetarëve pritet të mblidhet sërish nesër në orën 13:30 për të futur në kalendar dhe miratuar vendimet për ngritjen e dy komisioneve hetimore hetimore.
Konferenca e Kryetarëve ka arritur dakordësinë në parim për një tjetër çështje që shkaktoi bllokimin e veprimtarisë normale të Kuvendit, që ishte përfaqësimi me ato që opozita cakton vetë në proceset e Reformave.
Palët kanë rënë dakord në parim që Kuvendi të ngrejë një “Nënkomision për Reformat”, që përbëhet nga 4 anëtarë, 2 prej të cilëve do t’i caktojë Bledi Çuçi dhe 2 të tjerë, Gazment Bardhi, shkruan A2CNN. Nënkomisioni është përgjegjës për diskutimin/shqyrtimin e paketave ligjore, reformave dhe ligjeve që kërkojnë shumicë të cilësuar apo ligjeve që kërkojnë gjithëpërfshirje, përfshirë ligjet që janë të nevojshme për procesin e integrimit europian.
