Arsenal ka marrë fitore të rëndësishme në garën për titullin e Premier League, duke mposhtur Leicester City 2-0 në “King Power Stadium” të shtunën.
Hero i “Topçinjve” ka qenë Mikel Merino, i cili ka realizuar një dopietë vendimtare në minutat e fundit të takimit.
Pjesa e parë ka qenë dobët për skuadrën e Mikel Artetës, duke e pasur të vështirë të krijonte raste. Përveç një goditje me kokë të Declan Rice që ka përfunduar jashtë, Arsenal nuk ka rrezikuar seriozisht portën e Mads Hermansen. Ndërkohë, Leicester ka pasur një mundësi të mirë me Wilfried Ndidi, por goditja e tij nga distanca është pritur nga David Raya. Nigeriani ka humbur edhe një rast të artë në fund të pjesës së parë, kur ka gjuajtur jashtë me kokë nga një pozicion i favorshëm.
Në pjesën e dytë, loja është bërë më e hapur, sidomos pas minutës së gjashtëdhjetë. Ethan Nwaneri i është afruar golit me një goditje nga jashtë zone, e cila e ka prekur traversën. Në anën tjetër, Bobby De Cordova-Reid e ka provuar fatin me një goditje të fuqishme, por e cila ka rezultuar të jetë një pritje e lehtë për Raya.
Me kalimin e minutave, Nwaneri e ka goditur edhe shtyllën, duke treguar se ishte lojtari më aktiv i Arsenal në fazën sulmuese. Përpjekjet e tij janë shpërblyer kur ka dhuruar një asist për Merino, i cili me një goditje të saktë me kokë ka kaluar skuadrën mysafire në epërsi. Vetëm gjashtë minuta më vonë, mesfushori spanjoll e ka vulosur fitoren, duke shënuar nga afër pas një asisti të Leandro Trossard. Rtk.
Me këtë fitore, Arsenali mbetet në ndjekje të Liverpool, duke e ngushtuar diferencën në vetëm katër pikë, ndërsa “Të Kuqtë” do të luajnë të dielën ndaj Wolverhamptonit. Ndërkohë, Leicester zhytet në krizë, duke mbetur në zonën e rënies dhe duke regjistruar humbjen e pestë radhazi pa shënuar asnjë gol.
