Fluturimi i vështirë i futbollistëve të Astanës drejt Prishtinës është lehtësuar nga fitorja që kazakët e kanë marrë kundër Ballkanit.
Në ndeshjen e zhvilluar të enjten në stadiumin “Fadil Vokrri” skuadra nga kryeqyteti i Kazakistanit ka fituar me rezultat 2-1.
Kanë qenë mysafirët ata që në minutën e tetë e ka hapur sernë e golave përmes Jovancic.
Kundërpërgjigjja e suharekasve ka qenë e mënjëhershme, vetëm pas një minute, me Kuc, i cili ka realizuar gol të bukur me kokë.
Por mysafirët e kanë rigjetur epërsinë shpejt.
Ka qenë minuta e njëzet e dytë kur Islambek Kuat ka goditur me kokë një top të krosuar nga Timur Dosmagambetov.
Pjesa e dytë është shënuar e tëra nga përpjekja e kampionëve kosovarë për ta arritur barazimin, në disa raste me Tolajn e Manajn ka qenë afër, por pa sukses.
Pas kësaj humbje, në tabelën që e kryeson Viktoria Plzen, Ballkani mbetet në vendin e tretë me tri pikë.
