Bashkësia Islame e Kosovës (BIK) ka reaguar ashpër ndaj kërkesës së Prokurorisë së Dhomave të Specializuara në Hagë për dënim me nga 45 vjet burg për secilin nga ish-udhëheqësit e UÇK-së, të cilët njëkohësisht kanë ushtruar edhe funksione shtetërore në Kosovë, raporton Kosova Post.
Sipas BIK-ut, kjo kërkesë është e pabazuar dhe e padrejtë, duke përbërë një fyerje të rëndë ndaj luftëtarëve të lirisë dhe një sulm të drejtpërdrejtë ndaj sakrificës së bërë për çlirimin e vendit.
Në reagimin e saj thuhet se një qasje e tillë është fyese për viktimat e pafajshme dhe për heronjtë që dhanë jetën për liri, si dhe përbën përpjekje për njollosjen dhe degradimin e luftëtarëve, veteranëve dhe invalidëve të luftës çlirimtare.
BIK vlerëson se kërkesa e Prokurorisë ka karakter politik dhe synon barazimin e luftës çlirimtare të Ushtrisë Çlirimtare të Kosovës me regjimin kriminal të Sllobodan Millosheviqit, duke e cilësuar këtë si një barazim të papranueshëm historikisht, moralisht dhe juridikisht.
“Një barazim i tillë përbën rrezik serioz për të vërtetën historike dhe për drejtësinë”, thuhet në reagim.
Në fund, Bashkësia Islame e Kosovës shpreh besimin se drejtësia do të triumfojë dhe se vendimi i panelit gjykues do të jetë i drejtë, i paanshëm dhe meritor, duke sjellë liri për çlirimtarët dhe duke ruajtur dinjitetin e luftës për liri.
Reagimi është nënshkruar nga Myftiu i Kosovës, Naim ef. Tërnava.
