Zlatan Ibrahimoviq, këshilltari i lartë i “RedBird” për Milanin, ka dhënë një intervistë interesante për “Sports Illustrated”.
Të shumta temat e prekura, që nga momenti i tij aktual, deri te mundësia për të qenë trajner, teksa bëri një batutë për yllin norvegjez të Manchester Cityt, Erling Haland.
Si ju duket kur Halandin e krahasojnë me ju?
Ndoshta nga bishtaleci (qesh). Nuk më pëlqen të krahasoj lojtarët me njëri-tjetrin, sepse secili bën udhëtimin e tij dhe shkruan historinë e tij. Kam pasur epokën time, kam luajtur sipas mënyrës sime. Tani ai ka epokën e tij dhe luan në mënyrën e tij.
Pra, nuk mund të ketë një Zlatan të ri. Unë i kam bërë detyrat e shtëpisë, por e kam kaluar datën e skadencës. Erling Haland është një lojtar i madh dhe po bën një punë fantastike.
