Bayern Mynih do të sfidojë në “San Siro”, Interin për të kaluar në gjysmëfinalen e Champions League. Italianët fituan në transfertë përballjen e parë, por gjermanët kanë paralajmëruar se janë përgatitur për përmbysje.
Pas humbjes 1-2 në shtëpi kundër Interit në ndeshjen e parë çerekfinale të Champions League, në kampin e Bayern Munich u ndjenë polemika të lehta për festimet e zjarrta të zikaltërve, që sipas bavarezëve ishin të ekzagjeruara për një sukses që nuk garanton ende kualifikimin.
“E festuan sikur ta kishin kaluar turin, por ende ka gjithçka për të luajtur. Janë edhe 90 minuta dhe duhet vetëm një gol”, deklaroi Harry Kane pas përfundimit të sfidës në Allianz Arena.
Në të njëjtën linjë edhe trajneri Vincent Kompany: “Në fund të ndeshjes pashë Interin duke festuar shumë. Është në rregull, por ishte vetëm pjesa e parë.” Një mënyrë kjo për të ruajtur motivimin dhe besimin në grup, pavarësisht zhgënjimit të madh që solli goli i pësuar në fund, menjëherë pas barazimit.
Optimizmi bavarez nuk është zbehur as në ditët që pasuan. Pas barazimit 2-2 në klasiken ndaj Dortmundit, Thomas Muller e tha qartë:
“E quajnë ëndërr kualifikimin? Unë mendoj ndryshe. Nuk na duhet një mrekulli. Fitimi i një ndeshjeje në transfertë me një ose dy gola diferencë nuk është mrekulli për Bayern Munich. Duhet vetëm një ndeshje e mirë. Nëse fitojmë me një gol, shkojmë të paktën në shtesa.”
Kompany nga ana tjetër theksoi se skuadra e tij ka qenë krijuese dhe rrezikshme:
“Tifozët kundër Interit dhe Dortmundit panë 50 goditje drejt portës dhe shumë raste të mira. Ne mund të shënojmë, jemi të rrezikshëm dhe mund ta shfrytëzojmë këtë.”, shkruan oranews.al.Bayerni shkon në San Siro në 16 prill me bindjen se gjithçka është ende e hapur – dhe se këtë herë, festimet mund të jenë për ta.
