Media prestigjioze britanike BBC i ka kushtuar një artikull të veçantë yllit të muzikës pop Dua Lipa, pas marrjes së shtetësisë kosovare gjatë qëndrimit të saj në Prishtinë për Sunny Hill Festival.
Në shkrimin e publikuar, BBC vlerëson ndikimin e Lipës si një figurë me përmasa ndërkombëtare, që nuk ka harruar rrënjët e saj dhe ka ndihmuar në promovimin e imazhit të Kosovës në botë.
“Ndihem sikur të dyja anët e mia tani janë një”, citohet Dua nga BBC gjatë ceremonisë ku mori dokumentet e shtetësisë nga presidentja e Kosovës, Vjosa Osmani.
Lipa lindi në Londër nga prindër kosovarë-shqiptarë dhe kaloi disa vite të rinisë së saj në Prishtinë, pas shpalljes së pavarësisë së Kosovës në vitin 2008.
Në artikullin e tyre, BBC thekson se presidentja Osmani e quajti Lipën “një nga figurat më ikonike kulturore në historinë e vendit tonë”, duke shtuar se Dua dhe Kosova kanë qenë gjithmonë të pandashme. Në rrjetet sociale, Osmani shkroi: “Thesari i Kosovës – mirë se erdhe në shtëpi”.
BBC rikujton se Lipa tashmë mban tri shtetësi – britanike, shqiptare dhe kosovare dhe se është angazhuar me vite në mbështetjen e vendit të saj përmes muzikës, bamirësisë dhe festivalit ndërkombëtar Sunny Hill, të cilin e themeloi me babain në vitin 2018 për të ndryshuar perceptimet për Kosovën.
Gjatë ceremonisë, këngëtarja u mirëprit nga një kor fëmijësh që interpretoi këngën e saj “Levitating”, ndërsa të pranishëm ishin edhe personalitete të huaja si ambasadori britanik në Kosovë, Jonathan Hargreaves, i cili u shpreh se si Mbretëria e Bashkuar dhe Kosova janë të dyja krenare që ta quajnë Dua Lipën të tyren.
“E dua këtë vend dhe kjo do të thotë shumë për mua dhe familjen time”, shkruan BBC, duke cituar këngëtaren, e cila e mbylli natën e saj të performancës në festival me një mesazh emocional: “Të ndaj këtë natë me ju, në qytetin që më formoi… është e vështirë ta përshkruaj me fjalë se çfarë do të thotë kjo për mua”.
