Presidentja e Komisionit Evropian, Ursula von der Leyen, ka shpallur paketën e 20-të të sanksioneve kundër Rusisë, e cila shënjestron sektorët e energjisë, shërbimeve financiare dhe tregtisë, transmeton Anadolu.
“Komisioni po paraqet një paketë të re sanksionesh, të 20-tën që nga fillimi i luftës agresive të Rusisë kundër Ukrainës. Paketa e re e sanksioneve mbulon energjinë, shërbimet financiare dhe tregtinë”, tha von der Leyen në një njoftim me shkrim.
Ajo tha se masat përfshijnë “një ndalim të plotë të shërbimeve detare” për naftën bruto ruse, me qëllim uljen e mëtejshme të të ardhurave energjetike të Moskës.
“Po listojmë edhe 43 anije të tjera që janë pjesë e flotës hije, duke e çuar numrin total në 640. Gjithashtu e bëjmë më të vështirë për Rusinë të sigurojë cisterna që përdoren për flotën hije dhe vendosim ndalime gjithëpërfshirëse për ofrimin e mirëmbajtjes dhe shërbimeve të tjera për cisternat e gazit natyror të lëngshëm (LNG) dhe anijet akullthyese, për të goditur më tej projektet e eksportit të gazit”, theksoi von der Leyen.
Ajo gjithashtu njoftoi një grup të dytë masash që synojnë kufizimin e sistemit bankar rus dhe aftësisë së tij për të krijuar kanale alternative pagesash, përfshirë listimin e 20 bankave rajonale shtesë.
“Do të marrim masa kundër kriptomonedhave, kompanive që tregtojnë me to dhe platformave që mundësojnë tregtinë e kriptomonedhave, për të mbyllur një rrugë për shmangie. Po ashtu po synojmë disa banka në vende të treta që janë të përfshira në lehtësimin e tregtisë së paligjshme të mallrave të sanksionuara”, shtoi ajo.
Ajo tha se blloku evropian gjithashtu po ashpërson kufizimet e eksportit drejt Rusisë me ndalime të reja për mallra dhe shërbime, përfshirë gomën, traktorët dhe shërbimet e sigurisë kibernetike.
Përveç kësaj, shtoi ajo, Komisioni Evropian do të vendosë ndalime të reja importi për metale, kimikate dhe minerale kritike që ende nuk janë nën sanksione.
“Ne vendosim kufizime të mëtejshme eksporti për artikuj dhe teknologji të përdorura për përpjekjet luftarake të Rusisë, si materialet për prodhimin e eksplozivëve. Propozojmë gjithashtu një kuotë për amoniakun për të kufizuar importet ekzistuese”, tha von der Leyen.
Ajo theksoi se BE-ja për herë të parë do të aktivizojë mjetin kundër shmangies së sanksioneve, duke ndaluar eksportin e makinave me komandë numerike kompjuterike (CNC) dhe radiove drejt juridiksioneve, ku “ekziston rrezik i lartë që këto produkte të rieksportohen në Rusi”.
“Në fund, propozojmë garanci më të forta ligjore për kompanitë e BE-së për t’i mbrojtur ato nga shkeljet e të drejtave të pronësisë intelektuale ose nga shpronësimet e padrejta në Rusi, si pasojë e vendimeve abuzive gjyqësore të lidhura me sanksionet”, shtoi ajo.
Ajo u bëri thirrje vendeve anëtare të bllokut që t’i miratojnë “me shpejtësi” sanksionet e reja, për të “dërguar një sinjal të fuqishëm përpara përvjetorit të katërt të zymtë të kësaj lufte”.
