Me mbulesën fetare në kokë, tekste për ndërgjegjësim shoqëror dhe muzikë rrok, këto gra nga Indonezia të bandës “Voice of Baceprot” kanë luajtur në skena të ndryshme nga Shtetet e Bashkuara e deri në Francë. Por ato janë nervoze për këtë javë.
Këtë të premte në Angli, do të jenë banda e parë nga Indonezia që do të performojnë në festivalin Glastonbury, një nga më të mëdhatë në botë, duke ndarë një skenë me Coldplay dhe Shania Twain. Fansat e grupit heavy metal me hixhab thonë se gjithçka lejohet përderisa nuk është kundër besimit të tyre fetar.
“Një bandë metali që vesh hixhab është ide e mirë, dua të them të kesh mbulesë nuk do të thotë se është pengesë që të bësh muzikë, në asnjë lloj zhanri”, shprehet Jihan Afifah, fanse.
“Mendoj se në islam është e përshtatshme. Ne nuk gjykojmë asgjë”, tha Pungky, fans. Për vetë bandën që po shkruan historinë, ky do të jetë një emocion I madh.
“Pesha mbi supet tona është shumë e madhe pasi përfaqësojmë edhe Indonezinë”, tha Frida Marsya Kurnia, kitariste.
Solistja Widi, kitaristja Frida dhe bateristja Euis janë njohur në një shkollë islamike ku dhe formuan bandën në vitin 2014.
Zhanri që ato kanë zgjedhur në muzikë, konsiderohet në vendin e tyre si satanist,shkruan A2CNN. Madje njëra nga vajzat tregojnë se prindërit kanë dashur të bënin pjesë të një rituali islamik shërimi, me shpresën për t’ia zbehur dashurinë për muzikën rrok.
