Sot ka filluar muaji i shenjtë i Ramazanit, ku besimtarët myslimanë për 30 ditë do të agjërojnë dhe do përmbushin një nga pesë obligimet shtyllë të fesë islame.
Besimtarët mysliman sot kanë nisur agjërimin e muajit të bekuar Ramazan. Kryetari i Bashkësisë Islame të Kosovës, Myftiu Naim Tërnava, i është adresuar opinionit publik dhe gjithë besimtarëve myslimanë me mesazh urimi me rastin e fillimit të muajit të bekuar Ramazan.
Myftiu Tërnava ka theksuar se Ramazani është një muaj madhështor në të cilin shumëfishohen veprat e mira dhe falen mëkatet për ata që agjërojnë dhe falin namazin me besim dhe devotshmëri. Sipas tij, agjërimi ka shumë dobi dhe urtësi.
“Duke e bërë agjërimin në formën më të mirë, besimtari e fisnikëron moralin, durimin, bujarinë dhe përpjekjet në atë që e kënaq Zotin. Muaji Ramazan është një mundësi që vjen vetëm një herë në vit, andaj ta shfrytëzojmë këtë mundësi dhe të përfitojmë prej tij, sikur të jetë Ramazani i fundit që do ta përjetojmë. Urime, shëndet dhe mbarësi për të gjithë besimtarët kudo që janë! Agjërim të lehtë dhe të pranuar te Zoti”, ka theksuar ai.
