Adriano do të luajë ndeshjen e tij lamtumirëse për futbollin… tetë vite pas herës së fundit. Ish-sulmuesi i Parmës, Interit dhe Romës ka vendosur të organizojë një event më 15 dhjetor në stadiumin “Maracanã” të Rio de Janeiros.
Ngjarja quhet “Beteja e fundit e Perandorit” dhe do të marrin pjesë një sërë yjesh që kanë luajtur krah tij, si te Flamengo ashtu edhe në futbollin italian.
Për skuadrën e Flamengo-s do të jenë legjenda si Zico, Junior, Petkoviç, Léo Moura, Vagner Love dhe Ronaldo Angelim. Ndërkohë, për ekipin “italian” do të jenë emra si Ivan Ramiro Cordoba, Nicolas Burdisso, Carlos Gamarra, David Pizarro, Maxwell, Maicon dhe Julio Cesar.
“Ajo që dikur ishte një ëndërr po bëhet realitet. Jam shumë i lumtur që do të kem kaq shumë “yje” dhe miq të pranishëm në ndeshjen time të lamtumirës dhe mezi po pres që të vijë dita. Do të jetë një festë e madhe,” tha Adriano gjatë ditëve të fundit.
Në vitin 2009, Adriano arriti të fitojë kampionatin brazilian pasi u kthye nga Interi, ku kishte fituar 4 tituj kampion, 2 Kupa të Italisë dhe një Superkupë, duke u larguar pak para suksesit historik të “Tripletës” me Mourinhon.
Ndeshja e lamtumirës po organizohet nga kompania sportive MTR7, në partneritet me MCASport dhe studion ligjore Diogo Souza.
“Edhe pse kam ndaluar së luajturi prej disa vitesh, kisha nevojë për këtë ndeshje për të mbyllur karrierën time. Ua detyroja të gjithë atyre që më kanë mbështetur dhe vazhdojnë ta bëjnë këtë.” Adriano pritet të luajë një pjesë me Flamengo-n dhe një tjetër me Interin.s.n.
