Ish-drejtuesi i Lëvizjes Vetëvendosje në Shqipëri, Boiken Abazi, ka bërë një postim në Facebook, përmes të cilit ka shprehur disa dëshira siç i ka quajtur ai, modeste dhe jo ezauruese, raporton KosovaPost.
Abazi ndër tjera ka shkruar: Pas një mbështetje edhe më të madhe nga Perëndimi për Ukrainën, Putini humbet luftën në Ukrainë dhe rrëzohet nga pushteti në Rusi.
– NATO dhe BE e pranojnë më në fund se e kanë humbur Serbinë dhe vendosin sanksione ndaj Vuçiqit dhe Dodikut, pa i bërë presion Kosovës dhe Bosnjes për të bërë lëshime.
Postimi i plotë:
Disa dëshira modeste, por jo ezauruese, për vitin 2023 🙂 :
– Pas një mbështetje edhe më të madhe nga Perëndimi për Ukrainën, Putini humbet luftën në Ukrainë dhe rrëzohet nga pushteti në Rusi.
– NATO dhe BE e pranojnë më në fund se e kanë humbur Serbinë dhe vendosin sanksione ndaj Vuçiqit dhe Dodikut, pa i bërë presion Kosovës dhe Bosnjes për të bërë lëshime.
– Në BE dhe ShBA, nis një kthim drejt shtetit social dhe mbrojtjes ambientale.
– Në Shqipëri populli nis e kërkon diçka më shumë sesa thjesht parti mafioze që ndërtojnë aparate klienteliste neoliberale. Në Kosovë, opozita heq dorë nga gatishmëria për të ulur pazarin me Serbinë, duke tentuar ta shesin kolaboracionizmin e tyre me Serbinë si qasje pro-perëndimore. Në trevat shqiptare reflektohen ndryshimet pozitive të dy republikave shqiptare.
– Shqipëria dhe Kosova forcojnë ushtrinë në bashkëpunim të ngushtë me NATO-në. Kosova bëhet anëtare me të drejta të plota në Këshillin e Evropës.
– Republika e Shqipërisë heq taksën për rrugën e kombit dhe kalon rezolutën në Kuvendin e Shqipërisë në përputhje me rezolutën e Kuvendit të Kosovës në lidhje me gjenocidin e Serbisë.
– Shqipëria dhe Kosova caktojnë një fond zhvillimor të përbashkët për stimulimin e prodhimit vendas dhe rritjen e punësimit.
– Ndalen vrasjet e grave në Shqipëri e Kosovë dhe caktohen 2 ditë pushim ekstra për gratë në muaj për shkak të pasojave shëndetësore që shkakton cikli menstrual, siç veproi së fundmi Spanja.
– Në Shqipëri e Kosovë caktohet minimumi jetik në përputhje me rezolutat e BE-së për të gjithë të varfërit dhe nis rritja e konsiderueshme e pensioneve.
– Rritet fondi për shëndetësinë dhe arsimin publik në Shqipëri e Kosovë duke siguruar cilësi dhe mbrojtje që fillon i ngjan së paku, p.sh. Sllovenisë.
– Ndryshimet ekonomiko-politike ndikojnë te ulja e emigrimit nga trevat shqiptare.
– Mërgata shqiptare nis e bashkohet rreth ideve progresive për të ndikuar në ndryshime rrënjësore në Shqipëri dhe përparimin e ndryshimeve në Kosovë.
– Këngë shqiptare me mesazhe emancipuese krijohen dhe bëhen “hitet” kryesore nëpër TV, kafenetë e klubet shqiptare.
