Bombardimet izraelite kanë lënë Spitalin Kamal Adwan në veri të Gazës pa ujë dhe energji elektrike, raportoi një burim mjekësor të dielën, përcjell Kosova Post.
“Uji, energjia dhe furnizimet me oksigjen janë ndërprerë që nga e shtuna në mbrëmje,” tha burimi.
“Ne nuk mund të kryejmë ndërhyrje kirurgjikale për shkak të mungesës së oksigjenit dhe ujit. Situata në spital është katastrofike,” shtoi ai.
Drejtori i spitalit, Hussam Abu Safiya, deklaroi të shtunën se disa persona u plagosën pasi forcat izraelite granatuan spitalin, duke shkaktuar dëme të mëdha në rezervuarët e ujit, oksigjenit dhe karburantit.
Ministria palestineze e Shëndetësisë bëri thirrje të premten për veprim ndërkombëtar për të ndalur sulmet izraelite ndaj spitaleve në Gaza.
Që nga 5 tetori, Izraeli ka nisur një operacion të madh tokësor në veri të Gazës me pretendimin për të parandaluar rikthimin e grupit të rezistencës palestineze Hamas. Megjithatë, palestinezët akuzojnë Izraelin për qëllimin e tij për ta pushtuar këtë zonë dhe për t’i zhvendosur me forcë banorët e saj.
Që atëherë, ndihma humanitare, përfshirë ushqimin, ilaçet dhe karburantin, nuk është lejuar pothuajse fare të hyjë në këtë zonë, duke lënë pjesën më të madhe të popullsisë, e cila aktualisht përllogaritet rreth 80.000, në prag të urisë.
Sipas autoriteteve shëndetësore palestineze, më shumë se 3.500 njerëz janë vrarë në veri të Gazës.
Ky sulm është pjesë e një lufte gjenocidale të nisur nga Izraeli kundër Gazës që nga një sulm i Hamasit vitin e kaluar, ku mbi 44.600 persona, shumica gra dhe fëmijë, kanë humbur jetën.
Muajin e kaluar, Gjykata Ndërkombëtare Penale (GjNP) lëshoi urdhërarreste për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza, shkruan trt balkan.Izraeli gjithashtu përballet me një padi gjenocidi në Gjykatën Ndërkombëtare të Drejtësisë për luftën e tij vdekjeprurëse në Gaza.
