Fabio Capello ka dalë me një mesazh të qartë për Barcelonën: nëse Interi i vitit 2010 arriti të ndalte Lionel Messin dhe super-Barcelonën në rrugën drejt fitimit të Champions League, atëherë edhe skuadra aktuale e Simone Inzaghit ka të gjitha mundësitë për të bërë të njëjtën gjë ndaj Lamine Yamal dhe shokëve të tij.
Inter drejt një tjetër faqeje historike
Interi ka siguruar një vend në gjysmëfinalet e Ligës së Kampionëve, pasi eliminoi Bayernin me rezultatin e përgjithshëm 4-3. Pas një fitoreje 2-1 në Mynih falë golave të Lautaro Martinez dhe Davide Frattesi, zikaltrit barazuan 2-2 në ‘San Siro’, me golat e Lautaros dhe Benjamin Pavard, duke avancuar me meritë.
“Interi mund t’ia dalë sërish”
Në analizën e tij për ‘La Gazzetta dello Sport’, Capello ka vlerësuar fuqinë ofensive të Barcelonës, duke theksuar se me Yamal, Raphinha-n dhe Lewandowskin, katalanasit kanë ndoshta repartin më të frikshëm ofensiv në botë aktualisht. Por ish-trajneri legjendar beson se Interi ka armët për t’i përballuar.
“Nëse Interi që fitoi ‘tripletën’ ndali Messin, atëherë mund ta bëjë edhe tani ndaj Yamal-it,” shkruan Capello.
Ai shton se Inzaghi nuk do t’u lërë hapësirë lojtarëve si Yamal apo Raphinha, duke theksuar se “Barcelona ka shumë cilësi për t’u ndalur në lojë të hapur”, ndërsa “Lewandowski është vrasës brenda zonës”. Por nga ana tjetër, Capello thekson që Interi është mjeshtër në mbylljen e hapësirave dhe ruajtjen e ekuilibrit.
Beteja e madhe, në mesfushë
Sipas Capello-s, çelësi i kualifikimit do të jetë beteja në mesfushë. Ai thekson duelin mes klasit së Pedrit dhe De Jong ndaj cilësisë dhe dinamizmit të Barella-s, Calhanoglu dhe Mkhitaryan.
“Pedri dhe De Jong janë mjeshtër në transformimin e aksioneve nga mbrojtja në sulm,” – shkruan Capello, “por po të duhej të zgjidhja, do të mbaja mesfushorët e Interit. Pak ekipe në Europë kanë një repart kaq të mirorganizuar.”
Në përfundim…
Sfida mes Interit dhe Barcelonës pritet të jetë një nga përplasjet më emocionuese të këtij sezoni në Europë, por me një Capello që beson fort në projektin e Inzaghit dhe në fuqinë e një Interi që, siç thotë ai, nuk ka më frikë nga askush. Ndaj, për Yamal dhe shokët e tij, rruga drejt finales nuk do të jetë aspak e lehtë.s.net.
