Ministri në detyrë i Kulturës, Hajrulla Çeku, ka njoftuar se Çarshia e vjetër e Pejës po bëhet me plan të menaxhimit 10-vjeçar, përcjell KosovaPost.
Nëpërmjet një postimi në Facebook, Çeku u shpreh se përgjatë mandatit të kaluar janë kryer në mori restaurimesh, teksa plani i menaxhimit është një dokument strategjik që vendos kornizën për ruajtjen, promovimin dhe menaxhimin e Çarshisë, shkruan IndeksOnline.
“Dokumenti është hartuar nga profesionistë të institucioneve vartëse të Ministrisë së Kulturës – QRTK Pejë, në bashkëpunim me Komunën e Pejës dhe organizatat joqeveritare në Pejë, me mbështetjen e ekspertëve ndërkombëtarë dhe OSBE.
Plani orienton zhvillimin urban në përputhje me trashëgiminë kulturore dhe synon përmirësimin e hapësirave publike, për të rritur cilësinë e jetës dhe përvojën e vizitorëve, duke nxitur njëkohësisht turizmin kulturor, ekonominë lokale dhe krijimin e vendeve të reja të punës” shkroi Çeku.
Ky është njoftimi i plotë i tij:
Çarshia e Vjetër e Pejës bëhet me Plan të Menaxhimit 2025–2035
Në mandatin tonë, në trashëgiminë kulturore të Pejës është investuar si asnjëherë më parë.
Kemi restauruar asete të shumta, ndër to: kullën e Fazli Buqollit në Raushiq, kullën e Sheremetit, shkollën e parë shqipe, dyqanin e Musa Goranit në Çarshinë e Pejës, mullirin e Çal Malushit në Kotradiq, konakun e Mahmut Begollëve, kullën e Goskajve, ndërsa shumë të tjera janë në proces restaurimi.
Tash kemi miratuar edhe Planin e Menaxhimit për Çarshinë e Vjetër, një dokument strategjik që vendos kornizën për ruajtjen, promovimin dhe menaxhimin e Çarshisë së Vjetër të Pejës.
Dokumenti është hartuar nga profesionistë të institucioneve vartëse të Ministrisë së Kulturës – QRTK Pejë, në bashkëpunim me Komunën e Pejës dhe organizatat joqeveritare në Pejë, me mbështetjen e ekspertëve ndërkombëtarë dhe OSBE.
Plani orienton zhvillimin urban në përputhje me trashëgiminë kulturore dhe synon përmirësimin e hapësirave publike, për të rritur cilësinë e jetës dhe përvojën e vizitorëve, duke nxitur njëkohësisht turizmin kulturor, ekonominë lokale dhe krijimin e vendeve të reja të punës.
Gjatë vitit 2026 do të vazhdojmë me investime në tërësinë urbanistike të Çarshisë së Pejës.
