Kandidati i Vetëvendosjes për kryetar të Prishtinës, Hajrulla Çeku, në ditën e dytë të fushatës për zgjedhjet lokale të 12 tetorit thotë se e vazhdoi me takime me grupe profesionistësh.
Ai tha se reformat që i synojnë në Prishtinë, nuk lidhen vetëm me ndërtimin e çerdheve e shkollave të reja, por edhe me përmirësimin e sistemit brenda tyre.
Ai ka treguar se këtë të diele fushate, ka zhvilluar biseda me logopedë, për rolin e tyre në zhvillimin e shëndetshëm të fëmijëve.
“Po vazhdojmë takimet me grupe profesionistësh për t’i dëgjuar dhe për të diskutuar sfidat e punës së tyre, me qëllim që t’i adresojmë bashkërisht, në përputhje me programin tonë. Me logopedët biseduam për shërbimet mbështetëse, për rolin e tyre në zhvillimin e shëndetshëm të fëmijëve dhe për nevojën e bashkëpunimit mes nivelit qendror dhe atij lokal. Reformat që synojmë në Prishtinë nuk lidhen vetëm me ndërtimin e çerdheve e shkollave të reja, por edhe me përmirësimin e sistemit brenda tyre. Vetëm me mbështetjen e profesionistëve të fushave të ndryshme mund t’u ofrojmë fëmijëve atë që u nevojitet”, ka thënë Çeku që është në garë për kryetar kryeqyteti.
