Pas raportimeve të mediave se është planifikuar një atentat ndaj kryetarit të LDK’së, Lumir Abdixhiku dhe tre deputetëve të kësaj partie, Avdullah Hotit, Arben Gashit dhe Armend Zemajt, e konfirmoi edhe Policia e Kosovës, që kanë ndërmarrë të gjitha masat.
Ishte nënkryetari i LDK’së, Kujtim Shala, i cili e zbuloi se këto planifikime përveç në Kosovë ishin zhvilluar në disa vende të BE-së dhe jashtë saj.
Ndërsa përmendi dy organizata që janë të përfshira në këtë planifikim, njëra që vepron në Kosovë dhe tjetra jashtë saj.
Ndërsa ka theksuar se këta individ që planifikonin këtë atentat kanë rënë pre e përgjimeve të një vendi të BE-së.
“Mund të konfirmojë se ka pasur një lloj planifikimi në Kosovë dhe disa vende të BE-së dhe jashtë territorit të Evropës. Individët kanë rënë pre e përgjimeve të një vendi të BE-së. Nga ajo që na është thënë ka pasur një plan të strukturuar për atentat ndaj Abdixhikut dhe tre deputetëve të LDK’së”, tha Shala.
Ndërsa burimet e Gazeta Insajderi tregojnë se kërcënimi ndaj deputetëve të LDK-së u zbulua nga Shërbimi Sekret i Gjermanisë (BND).
BND-ja gjermane ka rënë në gjurmë të atentatorëve të cilët po planifikonin një atentat direkt ndaj kryetarit të LDK-së dhe deputetëve të kësaj partie.
Po ashtu, këto burime thonë se organet e Gjermanisë kanë njoftuar Policinë e Kosovës për këtë rast.
E për këtë kanë folur edhe nga Policia e Kosovës, duke thënë se kanë ndërmarr të gjitha veprimet e nevojshme policore lidhur me rastin.
Zëdhënësi i policisë Bajram Krasniqi, tha se veprimet e mëtejme do të merren në koordinim me organet e drejtësisë.
“Policia e Kosovës, në këtë rast drejtoria kompetente e PK-së, ka ndërmarr të gjitha veprimet e nevojshme policore lidhur me rastin/kanosjen në fjalë. Të gjitha veprimet e mëtejme policore do të ndërmerren në bashkëpunim dhe koordinim me organet e drejtësisë”, tha Krasniqi.
