Milani mori 3 pikë të çmuara në Venecia, por Europa mbetet ende larg për kuqezinjtë, që mbyllën me sukses një javë të vështirë.
“Ekipi tregoi karakter. Ne kishim dëshirën për të marrë 3 pikët.”, tha trajneri i Milan, Sergio Conceisao.
“Pas fitores në derbi nuk ishte e lehtë të gjeje menjëherë përqendrimin e duhur, i cili në fakt shpesh ka munguar këtë sezon. Ishte thelbësore të fitonim për t’i dhënë vazhdimësi suksesit të arritur në Kupë“, tha portugezi.
Gjithsesi, Champions League mbetet ende shumë larg: “Te Milan, të përfundosh në katër vendet e para është gjithmonë një objektiv thelbësor. Çdo sezon ka historinë e vet dhe këtë vit patëm shumë vështirësi.
Megjithatë, fitimi i një trofeu tjetër do të ishte i rëndësishëm për të ndryshuar imazhin që kemi dhënë për veten në muajt e fundit. Po gjejmë atë ekuilibër teknik për të cilin është folur për njëfarë kohe”, shtoi Conceisao.
“Na është dashur të rregullojmë diçka në mbrojtje. Nuk jam fans i këtij sistemi, me 3 mbrojtës, por përshtatem. Duhet të punosh bazuar në karakteristikat e lojtarëve dhe kampionatit”, tha trajneri portugez.
Duke folur për të ardhmen e tij, ai shtoi: “Tani rëndësi ka vetëm Milan. Unë dhe stafi im punojmë me orë të tëra çdo ditë. Është normale që ka pasur momente të vështira, në të cilat nuk e kemi njohur veten.
Po punojmë për të ndryshuar kursin. Brenda një muaji a më shumë do të vendos edhe unë se çfarë të bëj. Ndoshta do të mendoj të shkoj me pushime për dhjetë vjet në Algarve, në Portugali, kush e di”, tha Sergio Conceisao.s.n.
