Ka dështuar mbledhja e fundit e rregullt e mandatit aktual të Kuvendit Komunal të Prishtinës.
Kio për shkak të mungesës së përfaqësuesve të Lidhjes Demokratike të Kosovës dhe të Aleancës për Ardhmërinë e Kosovës.
Opozita ka akuzuar këto dy parti politike për papërgjegjësi politike dhe ikje nga llogaridhënia.
“Është për keqardhje që legjislatura po e pengon mbajtjen e seancës së fundit. Një sërë shkeljesh janë gjetur në raportin e Auditorit, sot do të duhej që rrugët tona të emëroheshin me heronjtë e kombit. Kjo nuk është hera e parë që ndodh kështu, në Kuvendin Komunal mungesat e pushtetit kanë qenë të shpeshta. Këta nuk kanë munguar vetëm kur ka pasur më rend dite shkëmbimi i pronave dhe subvencionet”, ka deklaruar asamblisti i LVV-së, Gëzim Sveçla.
Ndërkaq, Leutrim Retkoceri nga PDK e akuzoi kryetarin e Prishtinës, Përparim Rama, për shmangie të qëllimshme të transparencës.
“Përparim Rama dhe ekzekutivi nuk erdhën as sot, e mbyllën me përbuzje. Kështu kanë qeverisur, ende nuk kemi përgjigje për 12 milionë euro për arkitektin e qytetit dhe gjetjet e auditorit, ato para nuk dihet ku kanë përfunduar. Sot nuk kemi pasur buxhetin për vitin 2026, ne vetëm po shohim ikje nga Përparim Rama”, ka thënë Retkoceri.
